Президенти Исроил Исҳоқ Ҳерсог, раҳбари ҳизби “Яшар” Гади Айзенкотро барои ташкили ҳукумати нави кишвар вазифадор кардааст. Ин тасмим дар пасманзари ихтилофҳои сиёсӣ ва идомаи буҳронҳои амниятӣ дар минтақа гирифта шудааст.

Бино ба гузоришҳо, Айзенкот аз ҷониби 67 намояндаи ҳизбҳо ва гурӯҳҳои парлумонӣ барои ин вазифа пешниҳод шудааст. Ҳерсог баъд аз машварат бо намояндагони аҳзоб номзадии ӯро тасдиқ кардааст.

Президенти Исроил дар ҷараёни эълони ин қарор гуфт, ки кишвар ба ҳукумати устувор ниёз дорад, то тавонад бо мушкилоти амниятӣ ва сиёсӣ дар дарозмуддат рӯбарӯ шавад. Ӯ вазъи Эрон, Ғазза ва Лубнонро аз масъалаҳои муҳимми пешорӯи ҳукумати оянда ном бурдааст.

Айзенкот пас аз гирифтани ин масъулият гуфтааст, ки Исроил дар шароити фавқулода қарор дорад. Ба гуфтаи ӯ, ҳадафҳои ҷанг ҳанӯз пурра иҷро нашудаанд ва ҳамзамон ихтилофҳои дохилии сиёсӣ вазъи кишварро печидатар кардаанд.

Ӯ ҳамчунин, ба танишҳо дар муносибатҳои Исроил бо шарикони байналмилалӣ ишора карда, гуфтааст, ки кишвар ҳатто аз ҷониби муттаҳидони худ низ бо мушкилот рӯбарӯ шудааст.

Таҷрибаи низомӣ ва ворид шудан ба сиёсат

Гади Айзенкот аз чеҳраҳои собиқадори низомии Исроил ба шумор меравад. Ӯ соли 2015 раҳбари ситоди кулли артиши ин кишвар шуд ва то соли 2019 дар ин вазифа фаъолият кард. Дар тӯли фаъолияти ҳарбӣ ба амалиётҳои Исроил дар Лубнон, Сурия ва сарзаминҳои Фаластин иртибот дошт.

Номи ӯ бо доктринаи низомии “Зоҳия” низ пайванд дорад. Ин равиш истифодаи неруи густурдаи низомӣ ва тахриби инфрасохтори минтақаҳоеро дар назар мегирад, ки Исроил онҳоро манбаи ҳамлаҳо медонад. Ин доктрина пас аз ҷанги соли 2006 бо Лубнон мавриди таваҷҷуҳ қарор гирифт.

Айзенкот соли 2022 ба сиёсат ворид шуда, ба эътилофи “Лагери миллӣ”-и Бени Гантс пайваст. Пас аз оғози ҷанг дар Ғазза дар моҳи октябри соли 2023 ӯ ба ҳукумати изтирории Бенямин Нетаняҳу шомил шуд ва дар Шурои ҷанг иштирок кард.

Аммо моҳи июни соли 2024 ҳамроҳ бо Гантс аз ҳукумат хориҷ шуд. Ӯ Нетаняҳуро танқид карда буд, ки қарорҳои муҳимро ба таъхир мегузорад ва манфиатҳои сиёсиро аз идораи ҷанг болотар мегузорад.

Мавқеъ дар масъалаи Эрон ва Ғазза

Айзенкот дар масъалаи Ғазза ҷонибдори хотима додан ба ҳокимияти ҲАМОС ва таъсиси сохтори нави идоракунӣ бо пуштибонии байналмилалӣ ва минтақавӣ мебошад. Ҳамзамон, ӯ бо идораи доимии низомии ин минтақа аз ҷониби Исроил мухолифат мекунад.

Дар мавриди Эрон бошад, ӯ аз берун овардани урани ғанишуда ва ҷорӣ кардани назорати сахттар ба барномаи ҳастаии ин кишвар ҷонибдорӣ мекунад. Айзенкот ҳамчунин, истифодаи фишори низомиро барои расидан ба созиш дар масъалаи ҳастаии Эрон яке аз роҳҳои таъсиррасонӣ медонад.

Ӯ, инчунин, хостори густариши муносибатҳои Исроил бо кишварҳои арабӣ дар доираи Созишномаи Иброҳим аст.

Барномаи сиёсии Айзенкот нишон медиҳад, ки масъалаҳои амниятӣ ва сиёсати минтақавӣ дар маркази таваҷҷуҳи ӯ қарор доранд. Дар масъалаҳои Эрон ва Ғазза мавқеи ӯ дар чанд самти асосӣ ба сиёсати ҳукумати пешини Нетаняҳу наздик аст. Аммо дар масъалаи идоракунии дохилии кишвар ва тарзи қабули қарорҳо дар давраи ҷанг миёни онҳо ихтилоф вуҷуд дошт.

Dialog.tj