Ҳизби демократии ИМА дар натиҷаи охирини интихоботи миёндавраӣ бо ба даст овардани 51 курсӣ назорати Сенатро аз ҷумҳурихоҳон гирифт. Ҳамзамон, демократҳо дар Маҷлиси намояндагон низ бартарии худро афзоиш дода, дар интихоботи ҳокимони иёлатҳо пешсаф шуданд. Ин натиҷаҳо мавқеи сиёсии ҳукумати Доналд Трампро дар Конгресси ИМА бо мушкилоти ҷиддӣ рӯбарӯ мекунанд.

Ба гузориши расонаҳо, бар асоси омори охирини нашршуда, демократҳо то кунун 51 курсии Сенати ИМА-ро ба даст овардаанд. Ҷумҳурихоҳон бо 40 курсӣ дар мақоми баъдӣ қарор доранд.

Тибқи ин омор, демократҳо дар муқоиса бо ҳайати қаблии Сенат шаш курсӣ ба даст овардаанд, дар ҳоле ки ҷумҳурихоҳон низ шаш курсии худро аз даст додаанд.

Дар Маҷлиси намояндагони ИМА низ фосилаи байни ду ҳизб бештар шудааст. Демократҳо бо ба даст овардани 198 курсӣ дар муқобили 111 курсии ҷумҳурихоҳон пешсафанд. Ин омор аз афзоиши 19 курсии демократҳо ва коҳиши ҳамин миқдор курсӣ барои ҷумҳурихоҳон шаҳодат медиҳад.

Дар интихоботи ҳокимони иёлатҳо низ демократҳо бо ба даст овардани 24 мақом дар муқобили 15 мақоми ҷумҳурихоҳон пешсафанд. Ҳамзамон, шумораи ҳокимони иёлатҳо аз ҳизби демократ се нафар афзоиш ёфтааст.

Ин натиҷаҳо дар ҳоле ба даст омадаанд, ки фаъолияти ҳукумати Трамп дар ҷанги зидди Эрон, паёмадҳои иқтисодии ҷанг ва афзоиши хароҷоти зиндагӣ дар Амрико ба мавзуъҳои баҳсбарангези саҳнаи сиёсии ин кишвар табдил ёфтаанд.

Тағйири тавозуни қудрат дар Конгресс метавонад имкониятҳои демократҳоро барои назорат бар фаъолияти ҳукумати Трамп ва фишори сиёсӣ ба он бештар кунад. Ин вазъ ҳамчунин, метавонад дар роҳи татбиқи барномаҳои раиси ҷумҳури ИМА монеаҳо ва маҳдудиятҳои бештар эҷод намояд.

Dialog.tj