Як гурӯҳи ҳуқуқи башари Судон эълон кардааст, ки дар пайи ҳамлаи паҳподии артиши Судон ба бозоре дар шаҳри Ниола, воқеъ дар ҷанубу ғарби ин кишвар, беш аз 100 нафар ба ҳалокат расидаанд.

Хабаргузории “Ассошиэйтед Пресс” субҳи рӯзи чоршанбе, 28-уми октябр, гузориш додааст, ки ин хабарро гурӯҳи ҳуқуқи башари “Вакилони таъҷилӣ”, ки хушунатҳоро дар Судон пайгирӣ мекунад, дар як баёния эълон кардааст.

Бар асоси гузориш, ин гурӯҳи ҳуқуқи башар гуфтааст, ки ҳамлаи паҳподии мазкур рӯзи душанбе анҷом шудааст. Дар натиҷаи ин ҳамла, ба ҷуз кушташудагон, 113 нафар низ захмӣ шудаанд.

Ба гуфтаи ин гурӯҳи ҳуқуқи башар, бисёре аз кушташудагон ва захмиён занону кӯдакон мебошанд.

Дар баёния омадааст: “Ин куштор як бозори ғайринизомиро ба саҳнаи қатли омм ва захмбардории густурда табдил дод: ҳамлае, ки ҷони сокинонро таҳдид мекунад ва дар шароити идомаи ҷанг ранҷу азоби онҳоро бештар месозад”.

Шаҳри Ниола, маркази вилояти Дарфури Ҷанубӣ, таҳти назорати гурӯҳи ниманизомии “Неруҳои пуштибонии сареъ” қарор дорад. Ин гурӯҳ аз соли 2023 ба ин сӯ бо артиши Судон дар ҳоли ҷанг аст.

Бо вуҷуди ин, бар асоси гузориши Созмони Милали Муттаҳид, ин даргирӣ бузургтарин буҳрони башардӯстона дар ҷаҳонро ба вуҷуд овардааст. Тибқи ин гузориш, тақрибан 34 миллион нафар, яъне аз се ду ҳиссаи аҳолии Судон, ба кумакҳои башардӯстона ниёз доранд.

Dialog.tj