Раиси ҷумҳури Туркия дар пайи танишҳо бо Озарбойҷон бар сари манъи ҳиҷоб дар мактабҳои ин кишвар, мушовири аршади худ Оқтой Саралро барканор кард. Ба гузориши расонаҳо, ин тасмим метавонад ба иштироки Илҳом Алиев дар нишасти Созмони кишварҳои туркӣ дар Туркия мусоидат кунад.

Раҷаб Тайиб Эрдуғон, раисҷумҳури Туркия, рӯзи якшанбе мушовири аршади раёсати ҷумҳурӣ Оқтой Саралро барканор кард. Ин тасмим дар ҳоле гирифта шуд, ки ихтилофҳои Анқара ва Боку бар сари манъи ҳиҷоб дар мактабҳои Озарбойҷон шиддат гирифтаанд.

Ба гузориши расонаи “Мидл ист ай” (Middle East Eye), Туркия талош дорад равобити худро бо Озарбойҷон беҳбуд бахшад ва барои иштироки Илҳом Алиев, раисҷумҳури ин кишвар, дар нишасти Созмони кишварҳои туркӣ дар Туркия замина фароҳам кунад.

Сарал барканории худро тасдиқ карда, гуфтааст: “Барои тасмими раисҷумҳур эҳтироми комил қоилам”.

Ба иддаои “Мидл Ист Ай”, барканории ин мушовир дар посух ба дархостҳои Боку сурат гирифтааст. Як манбаъ дар Озарбойҷон ба ин расона гуфтааст, ки ин тасмим метавонад Алиевро ба ширкат дар нишасти Созмони кишварҳои туркӣ ташвиқ кунад. Пеш аз ин тасмим, эҳтимоли иштироки ӯ дар нишаст камтар аз 50 дарсад арзёбӣ мешуд.

Манъи ҳиҷоб чӣ гуна ба ихтилофи Анқара ва Боку табдил ёфт?

Ихтилофҳои ду кишвар аз моҳи гузашта оғоз шуданд. Он замон Озарбойҷон пӯшидани рӯсариро дар мактабҳои ибтидоӣ ва миёна манъ кард ва хонандагонро аз ҳузур дар мактабҳо боздошт.

Ин тасмим дар Туркия эътирозҳо ва интиқодҳо аз ҳукумати Бокуро ба бор овард. Оқтой Сарал низ дар вокуниш ба ин манъ дар шабакаҳои иҷтимоӣ паёме нашр карда, аз қарори Озарбойҷон интиқод намуд ва аз ҳукумати ин кишвар хост, ки онро бекор кунад.

Дар аввали моҳи ҷорӣ Ҳизби Озарбойҷони нав, ҳизби ҳокими ин кишвар, дар вокуниш ба изҳороти Сарал мавқеи тунде гирифт ва аз Анқара хост, ки аз “гароишҳои тасаллутҷӯёна дар ҷаҳони Ислом” худдорӣ кунад.

Бар асоси гузориши “Мидл Ист Ай”, Боку дар баробари барканории Сарал, пайгарди шарҳнависони шабакаҳои иҷтимоиро низ талаб карда буд. Ин афрод ба тавҳин ба Алиев муттаҳам шудаанд.

Нигаронии Туркия аз эҳтимоли бойкоти нишаст аз сӯи Алиев

Мақомоти Туркия нигарон буданд, ки Алиев дар вокуниш ба эътирозҳо дар Туркия аз ширкат дар нишасти Созмони кишварҳои туркӣ худдорӣ кунад.

Ин созмон Туркия, Озарбойҷон ва дигар кишварҳои туркзабонро гирди ҳам меорад ва яке аз ниҳодҳои муҳимми дипломатӣ барои ҳамкории Анқара ва Боку ба шумор меравад.

Эрдуғон рӯзи панҷшанбе дар тамоси телефонӣ бо Алиев ӯро барои иштирок дар ин нишаст даъват кард. Аммо дар баёнияҳои нашршудаи ду давлат мушаххас нашудааст, ки раисҷумҳури Озарбойҷон ин даъватро пазируфтааст ё на.

Туркия ва Озарбойҷон равобити худро маъмулан бо ибораи “як миллат, ду давлат” тавсиф мекунанд. Ин робита бар пайвандҳои қавмӣ ва фарҳангии ду кишвар асос ёфтааст.

Бо вуҷуди ин, ихтилофи ахир бар сари манъи ҳиҷоб дар мактабҳои Озарбойҷон ба як чолиши дипломатӣ барои равобити наздики ду кишвар табдил шудааст.

Dialog.tj