Владимир Путин, раиси ҷумҳури Русия қароре имзо кард, ки бар асоси он содироти беш аз як миллион рубли нақд аз Русия ба Тоҷикистон ва чанд кишвари дигар манъ карда мешавад.

Бар асоси ин фармони нави ҳукумати Русия шаҳрвандони воқеӣ наметавонанд ба кишварҳои узви Иттиҳоди иқтисодии Авруосиё (ЕАЭС) ва ҳамчунин, ба Тоҷикистон, Озарбойҷон ва Ӯзбекистон беш аз як миллион рубли нақд содир кунанд.

Барои шахсони ҳуқуқӣ ва соҳибкорони инфиродӣ бошад, содироти рубли нақд ба ин кишварҳо новобаста аз маблағ манъ шудааст. Зикр мешавад, ки бо вуҷуди ин, дар фармон баъзе истисноҳо пешбинӣ шудаанд. Аз ҷумла шаҳрвандон метавонанд ба воситаи баъзе фурудгоҳҳои байналмилалии Русия маблағи бештар аз як миллион рублро интиқол диҳанд. Агар ҳуҷҷатҳои зарурӣ, аз ҷумла иттилооти бонк дар хусуси гирифтани пул аз суратҳисоб ё пасандоз пешниҳод намоянд.

Барои ширкатҳое, ки ба ҳамлу нақли байналмилалӣ машғул мебошанд, низ истисно пешбинӣ шудааст. Ин ҳолат фақат дар сурате татбиқ мешавад, ки нуқтаи оғозу анҷоми ҳамлу нақл берун аз қаламрави Русия қарор дошта бошад.

Маҳдудиятҳо ҳамчунин, ба маблағҳои нақдие, ки барои фаъолияти намояндагиҳои дипломатӣ, консулгириҳо ва дигар муассисаҳои Русия дар хориҷ зарур мебошанд, рабт надорад.

Дар сурати вайрон намудани қоидаҳо, аз шаҳрвандон маблағи аз як миллион рубл зиёд мусодира мешавад. Аз шахсони ҳуқуқӣ ва соҳибкорони инфиродӣ бошад, ҳамаи маблағи рубли нақд, ки аз Русия бароварда мешавад, гирифта хоҳад шуд.

Ин қоидаҳои нав аз рӯзи 29-уми сентябри соли 2026 аз рӯзи иҷрои фармон мавриди амал қарор гирифтанд.

То ба имзо расидани ин фармон, аз 1-уми апрели соли 2026 шаҳрвандон метавонистанд ба кишварҳои узви Иттиҳоди иқтисодии Авруосиё рубли нақдро то муодили 100 ҳазор доллари ИМА ворид кунанд. Ин маҳдудият низ дар баъзе фурудгоҳҳои байналмилалӣ бо пешниҳоди санадҳои зарурӣ истисно дошт.

Ба Иттиҳоди иқтисодии Авруосиё Арманистон, Беларус, Қазоқистон, Қирғизистон ва Русия шомил мебошанд. Бо фармони нави Владимир Путин маҳдудияти содироти нақд барои шаҳрвандон ба як миллион рубл поин бурда шуда, он ба Тоҷикистон, Озарбойҷон ва Ӯзбекистон низ татбиқ шудааст.

Dialog.tj