Манобеи амниятии Покистон мегӯянд, неруҳои ин кишвар ҳамлаи гурӯҳи террористии Толибонро дар минтақаи марзии Гулистон рафъ карда ва чанд ҷангҷӯи ин гурӯҳро куштаанд.

Ба гузориши расонаҳои Покистон, 25-уми сентябр, манобеи амниятии ин кишвар гуфтаанд, ки дар ин ҳамла чанд ҷангҷӯи Толибон кушта шудаанд. Аммо онҳо дар бораи шумори дақиқи кушташудагон ва ҷузъиёти бештар аз ин даргирӣ маълумот надодаанд.

Манобеи Покистон ин амалиётро “талофӣ” номида ва гуфтаанд, ки он дар посух ба талоши вуруд ба хоки Покистон анҷом шудааст.

Толибон то кунун ба ин иддаои мақомоти Покистон дар бораи даргирӣ вокуниши расмӣ нишон надодаанд.

Идомаи танишҳо дар марз

Ин ҳодиса як рӯз пас аз он рух додааст, ки неруҳои ҳавоии Покистон рӯзи панҷшанбе чанд мавзеъро дар дохили Афғонистон ҳадафи ҳамла қарор доданд.

Исломобод иддао кардааст, ки ин мавзеъҳо барои “партофт ва нигоҳдории ҳавопаймоҳои бесарнишин” истифода мешуданд.

Таниш миёни Покистон ва ҳукумати Толибон дар моҳҳои ахир бар сари фаъолияти гурӯҳҳои мусаллаҳ дар минтақаҳои марзӣ афзоиш ёфтааст.

Покистон Толибонро ба паноҳ додан ба гурӯҳҳои мусаллаҳ ва террористӣ муттаҳам мекунад. Толибон ин иттиҳомро рад карда, мегӯянд, ки ноамнӣ дар Покистон масъалаи дохилии худи он кишвар аст.

Dialog.tj