Вазири корҳои хориҷии Эрон аз маъмурияти ИМА хост, ки пешниҳоди дурӯзаи Теҳронро қабул кунад ё роҳи ҷангро интихоб намояд.

Сайид Аббос Ироқчӣ, вазири корҳои хориҷии Эрон, дар вокуниш ба натиҷаҳои интихоботи миёндавраии ахири Конгресси ИМА изҳор дошт, ки акнун тасмимгирӣ ба дӯши Кохи Сафед аст.

Ироқчӣ дар паёми худ таъкид кардааст, ки раъйдиҳандагони амрикоӣ интихоби худро анҷом додаанд ва ҳоло навбати мақомоти Вашингтон аст, ки роҳи минбаъдаро муайян кунанд.

Вазири корҳои хориҷии Эрон ҳамчунин, аз мавҷуд будани пешниҳоди дурӯзаи кишвараш хабар дода, аз Кохи Сафед даъват кардааст, ки талаботи дар он зикршуда, аз ҷумла қатъи ҷанг дар тамоми ҷабҳаҳоро, бипазирад.

Ӯ дар идомаи паёми худ ҳушдор додааст, ки дар сурати интихоби роҳи ҷанг, неруҳои Эрон дар майдони набард вокуниш нишон хоҳанд дод.

Ироқчӣ дар ин бора навиштааст: “Раъйдиҳандагони амрикоӣ интихоби худро анҷом додаанд. Акнун навбати Кохи Сафед аст, ки интихоб кунад.

Пешниҳоди дурӯзаи мо рӯйи миз аст: талаботи он, аз ҷумла қатъи ҷанг дар тамоми ҷабҳаҳоро бипазиред ва натиҷаи онро бубинед.

Ё ҷангро интихоб кунед ва бубинед, ки чӣ гуна размандагони ҳушёр ва корозмӯдаи мо дар майдони набард ҷаҳаннаме аз оташ бар саратон фурӯ хоҳанд рехт”.

Dialog.tj