Вазири корҳои хориҷии Ҷумҳурии Исломии Эрон мегӯяд, ки норозигӣ аз сиёсати Исроил дар миёни сокинони кишварҳои минтақа ва Иёлоти Муттаҳидаи Амрико афзоиш ёфтааст. Тибқи гуфтаи ӯ, амрикоиҳо дигар намехоҳанд Исроил ҳукумати кишварашонро ба ҷангҳои беохир ҷалб намояд.

Бар асоси иттилои расонаҳои эронӣ Сайид Аббос Ироқчӣ, вазири корҳои хориҷии Ҷумҳурии Исломии Эрон дар вокуниш ба изҳороти Доналд Трамп дар саҳифаи худ дар   шабакаи иҷтимоии “Х” навишт, “президенти ИМА хуб дарк кардааст, ки аксарияти кулли шаҳрвандони Амрико ва Исроил сахт норозӣ мебошанд, вале зоҳиран ҳанӯз сабаби аслии ин норозигиро нафаҳмидааст”.

Тибқи навиштаи Аббос Ироқчӣ мардуми Иёлоти Муттаҳидаи Амрико аз он норозӣ мебошанд, ки Исроил ҳукуматҳои Иёлоти Муттаҳидаи Амрикоро фиреб дода, онҳоро ба ҷангҳои беохир мекашонанд.

Вазири корҳои хориҷии Эрон таъкид кардааст, ки мардуми минтақа низ аз чунин вазъ ба танг омадаанд.

Изҳороти зикршуда баъди он садо дод, ки Доналд Трамп дар суҳбат бо шабакаи “CBS” норозигии интихобкунандагон аз ҷанг бо Эрон, болоравии нархи бензин ва мухолифати густурда бар зидди Исроилро омилҳои шикасти ҷумҳурихоҳон дар интихоботи миёндавраии ин кишвар арзёбӣ намуд.

Dialog.tj