Стив Уиткофф, фиристодаи вижаи президенти ИМА дар умури Ховари Миёна мегӯяд, ки намояндагони Амрико ва Эрон дар ҳошияи нишастҳои Маҷмаи Умумии Созмони Милали Муттаҳид дар Ню-Йорк тавассути миёнаравҳо музокироти тӯлонӣ анҷом додаанд.

Ба гуфтаи Уиткофф, миёнаравҳо байни ду тараф дар рафтуомад буда, як даври музокиротро ба анҷом расондаанд. Ӯ ин гуфтугӯҳоро “созанда ва умедбахш” арзёбӣ карда, гуфтааст, ки кори миёнаравҳо дар рӯзҳои оянда идома хоҳад ёфт.

Уиткофф ҷузъиёти ин гуфтугӯҳо ва номи миёнаравҳоро ошкор накардааст.

Пеш аз ин низ баъзе расонаҳои арабӣ хабар дода буданд, ки Аббос Ироқчӣ, вазири корҳои хориҷии Эрон, дар ҳошияи нишастҳои Маҷмаи Умумии СММ пешниҳодҳои Теҳронро барои аз сар гирифтани музокирот бо ИМА ба миёнаравҳо пешниҳод кардааст.

Доналд Трамп низ иддао карда буд, ки Уиткофф ва Ҷаред Кушнер бо миёнаравҳои эронӣ мулоқоти «хеле созанда» доштаанд. Ба гуфтаи Трамп, ҳоло бояд дид, ки натиҷаи ин талошҳо чӣ хоҳад шуд. Ӯ ҳамчунин, изҳори умедворӣ кардааст, ки ду тараф метавонанд ба тавофуқ бирасанд.

То ҳол аз ҷониби мақомоти Эрон ҷузъиёти расмии ин музокирот ва натиҷаи онҳо ба таври мустақилона тасдиқ нашудааст.

Dialog.tj