Дар Вазорати фарҳанги Ҷумҳурии Тоҷикистон рӯнамоии китоби Президенти Ҷумҳурии Тоҷикистон муҳтарам Эмомалӣ Раҳмон бо номи «Ориёиҳо ва шинохти тамаддуни ориёӣ» баргузор гардид.

Тавре ки маркази матбуоти Вазорати фарҳанги Ҷумҳурии Тоҷикистон хабар медиҳад, китоби мазкур дар Ҷумҳурии Исломии Эрон бо хати ниёгон ба нашр расида, ба яке аз мавзуъҳои муҳими таъриху фарҳанги миллӣ – шинохт ва омӯзиши тамаддуни ориёӣ, таърихи кӯҳан ва саҳми ниёгони тоҷикон дар ташаккул ва рушди тамаддуни ҷаҳонӣ бахшида шудааст.

Манбаъ навиштааст, ки дар рӯнамоии китоб намояндагони аҳли илму адаб, олимону муҳаққиқон, таърихшиносон, пажӯҳишгарон, мутахассисони соҳаи фарҳанг, зиёиён ва намояндагони васоити ахбори омма иштирок намуданд.

“Зимни чорабинӣ таъкид гардид, ки асарҳои Пешвои миллат муҳтарам Эмомалӣ Раҳмон дар самти омӯзишу муаррифии таърихи пурифтихори миллати тоҷик, эҳёи арзишҳои миллӣ, ҳифзи мероси фарҳангӣ ва муаррифии тамаддуни тоҷикон дар арсаи байналмилалӣ аҳаммияти хосса доранд”, - зикр мегардад дар иттилоия.

Гуфта мешавад, ки нашри китоби «Ориёиҳо ва шинохти тамаддуни ориёӣ» бо хати ниёгон дар Ҷумҳурии Исломии Эрон дар таҳкими робитаҳои фарҳангиву илмии миёни кишварҳои ҳамзабон ва муаррифии арзишҳои таърихию фарҳангии миллати тоҷик заминаи муҳим фароҳам меорад.

Dialog.tj