‎Бинобар иттилои маркази матбуоти Вазорати энергетика ва захираҳои оби Ҷумҳурии Тоҷикистон, дар доираи лоиҳаи «Электрификатсияи деҳот» дар деҳаҳои дурдасти ноҳияи Мурғоби Вилояти Мухтори Кӯҳистони Бадахшон 22 неругоҳи офтобӣ бо иқтидори умумии 13 мегаватт сохта шудаанд.

Манбаъ навиштааст, ки лоиҳаи «Электрификатсияи деҳот» бо дастгирии Ҳукумати Ҷумҳурии Тоҷикистон ва Бонки Умумиҷаҳонӣ аз ҷониби ҶСК «Помир Энерҷӣ» амалӣ гардида истодааст.

“‎Бо мақсади дар сатҳи баланд таҷлил намудани ҷашни 35-солагии Истиқлоли давлатӣ, дар арафаи ин иди бузурги миллӣ ҶСК «Помир Энерҷӣ» тасмим гирифтааст боз 7 неругоҳи нави офтобиро бо иқтидори умумии 540 киловатт ба истифода диҳад”, - омадааст дар иттилоия.

‎Гуфта мешавад, ки ҳамчунин, нахустин неругоҳи бодӣ бо иқтидори 200 киловатт дар деҳаи Тохтамиши ноҳияи Мурғоб ба истифода дода хоҳад шуд.

Иттилоъ дода мешавад, ки татбиқи лоиҳаҳои мазкур қадами муҳим дар роҳи истифодаи манбаъҳои барқароршавандаи энергия, таъмини амнияти энергетикӣ, рушди «иқтисоди сабз» ва дастгирии аҳолии минтақаҳои кӯҳистони кишвар муҳим арзёбӣ мегардад.

Dialog.tj