Мақомҳои тандурустии Ҷумҳурии Демократии Конго эълом кардаанд, ки шумори ҷонбохтагони тасдиқшудаи бемории эбола дар ин кишвар ба 101 тан расидааст.

Хабаргузории “Рейтерз” рӯзи душанбе, 8-уми июн, ба нақл аз мақомҳои тандурустии Конго гузориш додааст, ки дар 24 соати гузашта 35 мавриди нави беморӣ ва 10 мавриди марг сабт шудааст.

Бар асоси гузориш, дар маҷмуъ 550 мавриди тасдиқшудаи беморӣ ба эбола дар ин кишвар сабт шудааст, ки аз ин миён, 294 маврид дар Итури, 15 маврид дар Кивуи шимолӣ ва се маврид дар Кивуи ҷанубӣ гузориш шудааст.

Мақомҳои тандурустии Конго гуфтаанд, ки густариши беморӣ дар минтақаҳои гирифтори ҷанг дар шарқи ин кишвар идома дорад ва ҳузури гурӯҳҳои мусаллаҳ раванди назорати ин бемориро бо мушкил рӯбарӯ кардааст.

Дар гузориш омадааст, ки ҳамла ба дастаҳои тандурустӣ ва маҳдудияти дастрасӣ дар баъзе минтақаҳо, маъракаи назорати бемориро бо мушкилоти ҷиддӣ рӯбарӯ кардааст.

Пеш аз ин, ниҳодҳои тандурустии байналмилалӣ дар бораи густариши бемориҳои сироятӣ дар минтақаҳои ноороми Африқо ҳушдор дода ва бар тақвияти низомҳои тандурустӣ ва назорати эпидемиологӣ таъкид карда буданд.

Эболa яке аз бемориҳои вирусии хеле хатарнок ва марговар аст, ки дар гузашта низ дар чандин кишварҳои Африқо талафоти густурдаи инсонӣ боқӣ гузошта буд.

Dialog.tj