Имрӯз, 3-юми июн дар толори Мақомоти иҷроияи ҳокимияти давлатии ноҳияи Айнӣ ҷаласаи ситоди ноҳиявӣ оид ба баррасӣ ва рафъи оқибатҳои офати табиие, ки рӯзҳои охир бар асари боришоти шадид дар як қатор деҳоти ноҳия ба амал омад, баргузор гардид.

Бинобар иттилои хадамоти матбуоти раиси ноҳияи Айнӣ,рӯзҳои 1-ум ва 2-юми июн дар натиҷаи боришоти шадиди борон дар ҳудуди ҷамоатҳои деҳоти Айнӣ, Рарз ва Шамтучи ноҳия сел омада, ба як қатор иншооти иҷтимоӣ ва инфрасохторӣ, инчунин, ба моликияти шаҳрвандон зарар расонидааст. Талафоти ҷонӣ ба қайд гирифта нашудааст.

Ҳамчунин, бар асари ин ҳодисаи табиӣ ба заминҳои кишоварзӣ, боғҳо, кӯчаҳо, роҳравҳо ва чанд манзили истиқоматӣ хисорот расидааст.

"Зимни кори ситод роҳбарони гурӯҳҳои кории ба минтақаҳои осебдида сафарбаршуда аз вазъи воқеии маҳал, ҳаҷми аввалияи зарар ва корҳои анҷомдодашуда гузоришҳои муфассал пешниҳод намуданд. Ҳамзамон, масъалаҳои марбут ба баҳогузории хисорот, расонидани ёрии фаврӣ ба аҳолии зарардида ва барқарорсозии инфрасохтори осебдида мавриди таҳлил ва баррасии ҳамаҷониба қарор гирифтанд", - навиштааст манбаъ.

Гуфта мешавад, ки бо қарори ситод гурӯҳҳои доимамалкунанда таъсис дода шуда, онҳо аз ҳисоби намояндагони мақомоти давлатӣ, сохторҳои ҳолатҳои фавқулода, мудофиаи гражданӣ ва дигар ниҳодҳои марбута ба минтақаҳои зарардида сафарбар гардиданд. Вазифаи асосии гурӯҳҳои мазкур омӯзиши вазъ дар маҳал, баҳодиҳии дақиқи хисорот ва андешидани чораҳои фаврӣ барои бартараф намудани оқибатҳои офати табиӣ ва кӯмак ба сокинони зарардида мебошад.

Иттилоъ дода мешавад, ки бинобар идома доштани боришот дар баъзе минтақаҳои ноҳия омӯзиши пурраи ҳаҷми зарар ҳанӯз ба анҷом нарасидааст.

Dialog.TJ