Русия эълом кард, ки сафири ин кишвар дар Арманистон барои машварат ва дар пайи бархе аз иқдомҳои охири Ереван ба Маскав фаро хонда шуд.

Вазорати корҳои хориҷии Русия гуфтааст, ин тасмим дар робита ба ҳаракати Арманистон ба сӯи Иттиҳоди Аврупо гирифта шудааст: раванде, ки ба ҳамкориҳо дар чаҳорчӯби Иттиҳоди иқтисодии Авруосиё осеб мерасонад.

Никол Пашинян пештар эълом карда буд, ки кишвараш хоҳони узвият дар Иттиҳоди Аврупо аст. Парлумони Арманистон низ дар моҳи феврал қонуни оғози раванди пайвастан ба Иттиҳоди Аврупоро тасвиб карда буд.

Владимир Путин таъкид кардааст, ки Арманистон ҳақ дорад шарикони худро интихоб кунад, аммо узвияти ҳамзамон дар ду сохтори мухталиф - Иттиҳоди Аврупо ва Иттиҳоди иқтисодии АвруОсиё имконпазир нест.

Ӯ ҳамчунин, аз Ереван хоста буд, ки ҳарчи зудтар қарори ниҳоии худро дар ин бора муайян кунад ва ҳушдор дода буд, ки дар сурати хориҷ шудани Арманистон аз Иттиҳодии иқтисодии Авруосиё, дастрасӣ ба созишномаҳои тиҷорати озодро аз даст хоҳад дод.

Гуфта мешавад, ки мақомоти Русия дар ҳафтаҳои ахир чанд бор ин мавқеъро такрор кардаанд ва ҳатто масъалаи маҳдуд кардани воридоти маҳсулоти арманӣ низ матраҳ шудааст.

Бо вуҷуди ин, дар нишасти ахири сарони Иттиҳоди иқтисодии Авруосиё гуфта шуд, ки масъалаи Арманистон ҷараёни нишастро соя наандохт, ҳарчанд дар бораи тамоюли Ереван ба Иттиҳоди Аврупо баҳс сурат гирифт.

Сухангӯи Кремл низ изҳор доштааст, ки бо наздик шудани Арманистон ба Иттиҳоди Аврупо, ин кишвар дер ё зуд дар вазъияте қарор мегирад, ки қоидаҳо ва меъёрҳои ду сохтор бо ҳам дар тазод хоҳанд буд.

Dialog.tj