Марк Карнӣ, сарвазири Канада эълом кардааст, ки равобити ин кишвар бо Чин пас аз гуфтугӯҳои сатҳи баланд бо вазири корҳои хориҷаи Чин, дар масири тақвият ва ҳаракат ба сӯи як ҳамкории созандатар қарор гирифтааст.

Хабаргузории “Анадоли” рӯзи шанбе, 30-уми май гузориш додааст, ки Марк Карнӣ ин изҳоротро пас аз дидор бо Ван И баён карда ва гуфтааст, ки ҳар ду ҷониб бар густариши ҳамкориҳо ва эҷоди имкониятҳои тоза тамаркуз кардаанд.

Ӯ гуфтааст, ин гуфтугӯҳо идомаи пешрафтҳое мебошад, ки дар ҷараёни сафараш ба Чин дар аввали соли ҷорӣ ба даст омада буданд ва ҳадафи он тақвияти равобити дуҷониба аст.

Ван И, ки барои як сафари серӯза ба Канада рафтааст, пас аз ҳудуди як даҳа вориди ин кишвар шудааст ва дар ҷараёни ин сафар бо мақомоти аршади канадагӣ дидор кардааст.

Бар асоси баёнияи Вазорати корҳои хориҷии Канада, ду ҷониб дар ин дидорҳо дар бораи мавзуъҳое чун масъалаҳои консулӣ, мудохилаи хориҷӣ, кори иҷборӣ ва ҳуқуқи башар гуфтугӯ кардаанд.

Онҳо ҳамчунин, бар баргузор кардани мунтазами нишастҳои солонаи вазирони корҳои хориҷӣ дар қолаби як гуфтугӯи дипломатӣ ва роҳбурдии сатҳи баланд ба тавофуқ расидаанд.

Dialog.tj