Қарор аст садҳо канадагӣ дар шаҳрҳои гуногуни ин кишвар бо рӯймолҳои сурх ва бо паёми “Бигзоред занон ва духтарони афғон таҳсил кунанд” роҳпаймоӣ намоянд.

Созмони “Ҳаққи омӯзиши Афғонистон” рӯзи ҷумъа, 29-уми май гуфтааст, ки ин роҳпаймоӣ дар рӯзҳои 30 ва 31-уми май дар шаҳрҳои гуногуни Канада баргузор хоҳад шуд.

Бар асоси хабарнома, дар Оттава, пойтахти Канада аз соати 2 то 6-и бегоҳ гурӯҳе аз занони афғон ва канадагӣ дар боғи Эндрю Хайден (Andrew Haydon) ҷамъ хоҳанд омад, то шеър бихонанд, садои худро баланд кунанд ва дӯстӣ ва ҳамбастагии иҷтимоиро ҷашн гиранд.

Дар хабарнома омадааст, ки ин роҳпаймоӣ ҷомеаҳои гуногунро барои як намоиши пурқудрати саросарии ҳимоят аз занон ва духтарони Афғонистон сафарбар хоҳад кард.

Лорин Утс, мудири иҷроии созмони Ҳаққи омӯзиши Афғонистон гуфтааст: “Миллионҳо духтари афғон таҳти ҳокимияти Толибон аз рафтан ба мактаб маҳрум шудаанд ва ҳар рӯзе, ки духтаре аз омӯзиш маҳрум мешавад, рӯзи беадолатӣ аст”.

Ба гуфтаи ӯ, бо ҳимоят аз ин роҳпаймоӣ, канадагиҳо нишон медиҳанд, ки ҳуқуқи занон аҳамият дорад ва занони Афғонистон танҳо нестанд.

Созмони “Ҳаққи омӯзиши Афғонистон” бар ин бовар аст, ки омӯзиш як ҳаққи асосии инсонӣ ва абзори пурқудрат барои тағйироти пойдори иҷтимоӣ мебошад.

Дар хабарнома афзуда шудааст, ки маҳрум сохтани занон ва духтарон аз ҳуқуқи инсонӣ навъе аз “апартеиди ҷинсиятӣ” маҳсуб мешавад.

Пас аз дубора ба қудрат расидани гурӯҳи террористии Толибон дар Афғонистон дар соли 2021 занон ва духтарон аз омӯзиш ва таҳсилоти олӣ маҳрум шуданд ва бо вуҷуди дархости кишварҳо, созмонҳои байналмилалӣ ва Созмони Милали Муттаҳид, то кунун ин гурӯҳ омода нашудааст аз мавқеи худ дар баробари занон ва духтарон ақибнишинӣ кунад.

Dialog.tj