Вазорати ҷанги Амрико эълом кардааст, ки баррасии тоза дар бораи дуруст ё нодуруст будани тасмими хуруҷи нерӯҳои ин кишвар аз Афғонистон дар моҳҳои оянда ниҳоӣ хоҳад шуд.

Рӯзномаи ҳарбии амрикоии “Старс анд Страйпс” (Stars and Stripes) рӯзи якшанбе, 19-уми апрел ба нақл аз Пентагон гузориш дода, ки як гурӯҳи вижа дар ин вазорат бо номи “Панели баррасии вижаи хуруҷ аз Афғонистон” таҳқиқоти худро тақрибан такмил карда ва қарор аст гузориши ниҳоии он ба зудӣ нашр шавад.

Бар асоси гузориш, ин гурӯҳи корӣ ба дастури Пит Ҳегсет, вазири ҷанги Амрико дар соли гузашта барои баррасии равандии хуруҷи нерӯҳои амрикоӣ аз Афғонистон дар августи 2021 ташкил шудааст.

Дар ҷараёни ин раванд, 13 сарбози амрикоӣ дар як ҳамлаи интиҳорӣ дар майдони ҳавоии Кобул кушта шуданд.

Сухангӯи Пентагон гуфта, ки ин гурӯҳи корӣ то кунун беш аз нуҳ миллион санадро аз ниҳодҳои мухталиф баррасӣ кардааст.

Ба гуфтаи ӯ, гузориши ниҳоии ин баррасӣ бо мақсади ҷилавгирӣ аз такрори “иштибоҳҳои гузашта” аст.

Дар ҳамин ҳол, мақомҳои амрикоӣ мегӯянд, тавофуқи соли 2020 миёни Амрико ва гурӯҳи террористии Толибон, ки дар давраи нахустини раёсати ҷумҳури Доналд Трамп имзо шуда буд, бар раванди тасмимгириҳо ва хуруҷи неруҳо таъсири мустақим доштааст.

Тибқи гузориш, ҳамчунин, дар баррасиҳои қаблӣ, ҳам давлати Трамп ва ҳам давлати Ҷо Байден ба навъе дар паёмадҳои хуруҷ ва суқути ҳукумати пешини Афғонистон масъул дониста шудаанд.

Dialog.tj