Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба паёми овозӣ ва наворе, ки дар паёмрасони Вотсап паҳн гаштааст ва гӯё дар ноҳияи Фархор бар асари истеъмоли ҳабҳои “Албендазол”, ки аз ҷониби кормандони соҳаи тандурустӣ тақсим гардидааст, бархе хонандагон дар муассисаҳои тандурустӣ бо ҳолати вазнин бистарӣ гаштаанд, вокуниш кард.

Манбаъ меафзояд, ки масъулини соҳаи тандурустии ноҳияи Фархор иттилоъ медиҳанд, ки дар ягон муассисаи тандурустии ноҳияи мазкур баъди истеъмоли “Албендазол” муроҷиате ба қайд гирифта нашудааст ва тақсими маводи болозикр тибқи тартиби муқарраргашта барои кӯдакону нарасони аз 7 то 14-сола дар муассисаҳои таълимии ноҳия идома дорад.

“Навори паҳншуда на дар ноҳияи Фархор, балки дар ноҳияи Мир Саид Алии Ҳамадонӣ сабт гардида, нафари дар сабтшуда Тоҷова Фаришта, соли таваллудаш 09.06.2015, истиқоматкунандаи ҷамоати Даштигулу, деҳаи Тагноб мебошад. Ташхиси табибон муайян намуд, ки номбурда на дар натиҷаи истеъмоли доруи “Албендазол” дилбеҳузур ва якбора бемор шудааст, балки номбурда гирифтори бемории диабети қанди навъи 1 будааст, ки омили асосии ин навъи диабети қанд ирсӣ мебошад”, - омадааст дар вокуниши Вазорати тандурустӣ.

Дар ин росто, Вазорати тандурустӣ таъкид мекунад, ки шаҳрвандон ба овоза ва ҳангомаҳои беасос нисбат ба хизматрасонии тиббӣ бовар накунанд.

Dialog.tj