Мақомоти интизомӣ дар вилояти Хатлон як ҷавондухтарро барои идора намудани нақлиёт бидуни шаҳодатнома ва ҳуқуқи ронандагӣ дастгир карданд.

Тавре ки Раёсати Вазорати корҳои дохилӣ дар вилояти Хатлон иттилоъ медиҳад, кормандони милитсия шаҳрванд Шарафова Маҳинабону Суҳробовна санаи таваллудаш 15.12.2007, зода ва истиқоматкунандаи ноҳияи Восеъро дар асоси идора намудани воситаи нақлиёт бидуни шаҳодатнома ва ҳуқуқи ронандагӣ дастгир карданд.

Гуфта мешавад, ки номбурда ин кирдори худро ба навор гирифта бо мақсади худнамоӣ дар саҳифаи шахсиаш бо номи "karamelka" дар Инстаграм нашр кардааст.

Иттилоъ дода мешавад, ки воситаи нақлиёт ба шаҳрванд Холов Шерзод Раҳмоналиевич санаи таваллудаш 12.12.1999 сокини н.Восеъ, шаҳраки Ҳулбук тааллуқ дорад.

Мақомот менависад, ки нисбат ба ҷавондухтар тибқи талаботи моддаи 336 қисми 1 ва нисбат ба соҳиби нақлиёт тибқи талаботи моддаи 336 қисми 2 Кодекси ҳуқуқвайронкуниии маъмурии Ҷумҳурии Тоҷикистон протоколи ҳуқуқвайронкунии маъмурӣ тартиб дода шуда, дар баррасӣ қарор дорад.

Зикр мегардад, ки идора намудани воситаи нақлиёт бе шаҳодатномаи ронандагӣ тибқи қонун ба андозаи 250 нишондиҳанда барои ҳисобҳо баробар ба 19 500 сомонӣ ҷарима муқаррар намудааст. Илова бар ин, барои шахсе, ки воситаи нақлиётро ба шахси ҳуқуқи ронандагӣ надошта вогузор менамояд, ҷарима ба андозаи 200 нишондиҳанда барои ҳисобҳо баробар ба 16 500 сомонӣ ва маҳрум намудан аз ҳуқуқи ронандагӣ ба мӯҳлати 5 сол ҷазо пешбинӣ шудааст.

Dialog.tj