14-уми ноябр дар шаҳри Душанбе вазири тандурустӣ ва ҳифзи иҷтимоии аҳолӣ Ҷумҳурии Тоҷикистон Ҷамолиддин Абдуллозода бо ҳайати Бонки Ҷаҳонӣ, аз ҷумла роҳбари миссия ва лоиҳаи “Миллати солими Тоҷикистон” аз ҷониби бонки мазкур Такаҳиро Ҳасуми, роҳбари намояндагии Бонки Ҷаҳонӣ дар Ҷумҳурии Тоҷкистон Раҳимҷон Асангазиев вохурӣ намуд.

Тавре ки маркази матбуоти Вазорати тандурустӣ иттилоъ медиҳад, зимни вохӯрӣ гуфта шуд, ки амалишавии лоиҳаи “Миллати солими Тоҷикистон” нишонаи ҳамкории муштарак ва судманди Вазорати тандурустӣ ва ҳифзи иҷтимоии аҳолӣ бо бонки мазкур дар самти таъмини ҳифзи саломатии аҳолӣ ва боз ҳам беҳтар кардани сатҳу сифати хизматрасонии тиббӣ ба сокинони мамлакат мебошад.

Ҳамчунин, таъкид гардид, дар ҳоли ҳозир лоиҳа аз рӯи якчанд нишондиҳандаҳои муҳимтарини фосилавӣ, ки барои охири соли 2025 ба нақша гирифта шуда буданд, пеш аз муҳлат иҷро шуданд.

"Махсусан, дар қисми омӯзиши кадрҳои кумаки аввалияи тиббию санитарӣ аз рӯи омӯзиши тибби оилавӣ нишондод ба маротиб зиёдтар иҷро карда шуд. Дар қисми тандурустии ҷамъиятӣ низ гуфта шуд, лоиҳа нишондиҳандаи нақшавиро барзиёд иҷро карда, 554 мутахассиси соҳаи тандурустӣ оид ба назорати эпидемиологиро (ҳадаф 500) ба омӯзиш фаро гирифт", - менависад манбаъ.

Иттилоъ дода мешавад, ки ҷонибҳо доир ба самтҳои мавриди таваҷҷуҳи тарафайн, нақшаи ҳамкориҳои оянда ва дигар бахшҳои муҳими лоиҳаи мазкур гуфтугӯи судманд анҷом дода, баҳри тақвият бахшидани ҳамкориҳои минбаъда ҳавасмандии хешро изҳор доштанд.

Dialog.tj