Ширкати ҳавопаймоии “Сомон Эйр” хабар дод, ки нақша дорад 14 ҳавопаймои нави ширкати Boeing-ро харидорӣ кунад. 

Бар асоси нақшаи расмии ширкати “Сомон Эйр” ин бузургтарин фармоиши таърихии ширкат ба ҳисоб меравад ва дар доираи он ҳавопаймои навъи 787 Dreamliner ва 737 MAX харидорӣ мешаванд.

Тибқи созишномаи пешбинишуда “Сомон Эйр” бори аввал ният дорад, то чор ҳавопаймои васеъқад (широкофюзеляжный) — навъи 787-9 Dreamliner ба даст орад.

Ин ҳавопаймоҳо барои роҳандозӣ намудани хатсайрҳои нави байниконтиненталӣ аз шаҳри Душанбе истифода хоҳанд шуд.

Манбаъ меафзояд, ки ворид шудани ҳавопаймоҳои нави “Dreamliner” ба ширкати “Сомон Эйр” имконият медиҳад, ки ҷуғрофияи парвозҳои худро густариш дода, сатҳи роҳатии мусофиронро дар хатсайрҳои дарозу тӯлонӣ боло барад.

Илова бар ин, ширкат ният дорад бо харидории то даҳ ҳавопаймои навъи 737-8 флоти худро навсозӣ кунад. Ин навъи ҳавопаймоҳо барои хатсайрҳои кӯтоҳ ва миёна истифода хоҳанд шуд, ки боиси афзоиши шумораи парвозҳо, беҳтар гардидани хизматрасонӣ ва баланд бардоштани суръати интиқоли мусофирон мегардад.

Ба гуфтаи масъулони “Сомон Эйр”, иҷрои ин қарордод қадами муҳим дар таҳкими мавқеи ширкат дар бозори байналмилалии авиатранспорт буда, ҳамзамон ба рушди зерсохтори ҳавонавардӣ дар Тоҷикистон мусоидат хоҳад кард.

Dialog.TJ