Муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Саломуддин Юсуфӣ бо мақсади шиносоӣ бо ҳолати хизматрасонии тиббӣ ба аҳолӣ ва рафти корҳои таъмирӣ ба Муассисаи давлатии Беморхонаи клиникии вилояти Хатлон ба номи Бурӣ Воҳидов сафар кард.

Дар ин хусус маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар дода, аз қавли сартабиби беморхона Холмирзо Давлатзода меафзояд, ки муаассисаи мазкур дорои 610 ҷойи хоб буда, 21 шуъбаи табобатӣ ва 9 шуъбаи ёрирасонро дарбар мегирад.

Зикр шуд, ки дар беморхона 1196 корманд фаъолият доранд, ки аз онҳо 167 нафар табиб, 658 нафар корманди миёнаи тиббӣ, 315 нафар корманди поёнии тиббӣ ва 56 нафар корманди техникӣ мебошанд. 

Дар давоми 9 моҳи соли равон 13 духтур курси такмили ихтисосро гузаштаанд, ки аз онҳо шаш нафар дар хориҷи кишвар таҳсил кардаанд. Сатҳи тахассусии касбии духтурон 75, 5 фоиз ва кормадони миёнаи тиббӣ 62, 2 фоизро ташкил медиҳад. 

Дар ин муддат ба маъюбон, ниёзмандон ва шаҳрвандони камбизот хизматрасониҳои тиббии ройгон ба маблағи беш аз 380 ҳазор сомонӣ пешниҳод гардидааст. Ҳар рӯз беш аз 200 нафар ба беморхона муроҷиат мекунанд. Шуъбаҳои беморхона бо таҷҳизоти муосири ташхисӣ, табобатӣ ва ҷарроҳӣ муҷаҳҳаз буда, ҳамасола усулҳои нави ташхис ва муолиҷа ҷорӣ мегарданд.

Дар давоми 9 моҳи соли равон дар самтҳои урология, травматология ва ортопедия ҷарроҳии умумӣ ва рагҳо, ҳамчунин гаастроэнтерология 11 усули инноваатсионии табобат ва ҷарроҳӣ нахустин бор ҷори карда шудаанд.

Dialog.TJ