Бинобар иттилои маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, имрӯз, 25-уми октябр дар шаҳри Хуҷанд ҷаласаи ҷамъбастии Раёсати тандурустии вилояти Суғд вобаста ба натиҷагирӣ аз фаъолияти раёсати мазкур ва зерсохторҳои он дар нуҳ моҳи соли равон доир гашт.

Ба навиштаи манбаъ, дар ҷаласаи мазкур вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода, муовини Раиси вилояти Суғд Зайнура Азимӣ, сардори Раёсати тандурустии вилояти Суғд Фаррух Мақсудзода ва доираи васеи кормандону масъулини соҳаи тандурустии вилояти Суғд иштирок намуданд.

Иттилоъ дода мешавад, ки дар нуҳ моҳи соли ҷорӣ аз ҳамаи сарчашмаҳо 980 адад таҷҳизоту лавозимотҳои тиббӣ харидорӣ ва ба муассисаҳои тандурустии шаҳру ноҳияҳои вилоят дастрас карда шудаанд, ки барои боз ҳам беҳтар ба роҳ мондани сатҳи хизматрасонии тиббӣ ба аҳолии вилоят мусоидат хоҳад кард.

Гуфта мешавад, ки дар соли ҷорӣ таъмир ва сохтмони 101 адад муассисаи соҳаи тандурустии вилояти Суғд ба нақша гирифта шудааст.

Дар ҳоли ҳозир дар вилояти Суғд  944 муассисаи тандурустии давлатӣ, аз  ҷумла 136 муассисаи госпиталӣ, 808 сохтори КАТС ва 293 хусусӣ, ки аз онҳо 157 ҷамъияти дорои масъулияташон маҳдуд бо 58 намояндагӣ ва 78 соҳибкорони инфиродӣ мебошанд, фаъолият менамоянд.

Dialog.tj