Иёлоти Муттаҳидаи Амрико аз Ҷумҳурии Исломии Эрон даъват кард, то дар Иҷлосияи сулҳи Шарм-уш-Шайх ширкат варзад, ки ба масъалаи субот ва оташбас дар Навори Ғазза бахшида шудааст.

Тибқи гузориши Барак Ровид, рӯзноманигори расонаҳои байналмилалӣ Вазорати корҳои хориҷии Амрико рӯзи шанбе даъватномаи расмиро барои баргузории нишасти сарони кишварҳо дар мавриди вазъи Ғазза ирсол намуд. Ин иҷлос рӯзи душанбе дар шаҳри Шарм-уш-Шайх доир мегардад.

Сарчашмаҳои огоҳ мегӯянд, ки Амрико доираи даъватшудагонро густариш додааст. Дар миёни онҳо кишварҳои Испания, Ҷопон, Озарбойҷон, Арманистон, Маҷористон, Ҳинд, Эл-Салвадор, Қибрус, Юнон, Баҳрайн, Кувайт ва Канада низ ҳастанд.

Ба гуфтаи Ровид, яке аз сарчашмаҳои дипломатӣ тасдиқ намуд, ки Эрон низ дар феҳристи кишварҳои даъватшуда қарор дорад.

Дар ҳамин ҳол, гузоришҳо ҳокӣ аз он аст, ки Исроил дар ин иҷлос ширкат нахоҳад кард. Президенти Миср гуфт, ки иҷлоси сулҳи Шарм-уш-Шайх бо ҳузури Доналд Трамп ва 20 роҳбари кишвариҳои ҷаҳон доир хоҳад шуд.

“Иҷлоси сулҳи Шарм-уш-Шайх талошест барои боз намудани саҳифаи нав дар таъмини амният ва суботи минтақа” - зикр шудааст дар изҳороти расмии Қоҳира.

Илова бар ин, сарвазири Британия ва Раҷаб Тайиб Эрдуғон, Президенти Туркия низ ҳузури худро дар ин нишаст тасдиқ кардаанд.

Аз ҷониби дигар, роҳбари ҳаракати Ҳамос ба хабаргузори “Франс пресс” гуфт, ки раванди озодсозии зиндониён аз рӯзи душанбе оғоз хоҳад ёфт. Вале ҳамин манбаъ хабар дод, ки Ҳамос дар маросими имзои созишномаҳои сулҳи Ғазза, ки дар Миср доир мешавад, ширкат намекунад.

Ҳамзамон иттилоъ мерасад, ки Ҳусейн аш-Шайх, муовини роҳбари идораи худгардони Фаластин фардо бо Тони Блэр намояндаи собиқи Британия дар хусуси нақши идораи фаластинӣ дар идораи Навори Ғазза музокира хоҳад кард.

Иҷлоси Шарм-уш-Шайх ба гуфтаи таҳлилгарон метавонад оғози як марҳилаи нави ҳамоҳангии минтақавӣ барои эҳёи сулҳ дар Ғазза ва барқарорсозии низоми амниятӣ дар Ховари Миёна бошад.