Як низомии Исроил гуфт, ки “сарбозон ноумеду хаста шудаанд ва намедонанд барои чӣ меҷанганд”.

Хабаргузории “Ассошиэйтед пресс” ба нақл аз як низомии режими Исроил хабар дод, ки шумори зиёде аз сарбозони ин режим бо вуҷуди хатари зиндонӣ шудан, аз анҷоми хидмат худдорӣ мекунанд.

Як низомии исроилӣ ба ин хабаргузорӣ гуфтааст, ки сарбозон хаста шудаву ноумеданд ва намедонанд, барои чӣ меҷанганд.

Бар асоси ин гузориш, модарони сарбозони Исроил ҳаракати эътирозие барои боз доштани ирсоли писаронашон ба Ғазза роҳандозӣ кардаанд.

Натиҷаи таҳқиқоти дохилии режими Исроил нишон дод, ки фишорҳои равонии шадид ва хастагиҳои пай дар пай дар канори зарбаҳое, ки дар даргириҳои саҳроии Ғазза ба ин неруҳо ворид шудаанд, нақши асосӣ дар танишҳои равонии низомиёни Исроил доранд.

Ин таҳқиқот ҳамчунин, нишон дод, ки ҷанги фарсоянда дар Ғазза ва набудани ҳадафҳои мушаххас барои идомаи он боиси суст гардидани руҳияи низомиёни исроилӣ ва боло рафтани сатҳи худкушӣ дар миёни онҳо шудааст.

Тибқи гузориши расонаҳои режими Исроил, аз оғози ҷанг бар зидди Ғазза аз 7-уми октябри соли 2023 ҳадди аққал 44 низомии ишғолгар бо сабаби бемориҳои равонӣ, ки бар асари ҷанг  ба онҳо ворид шудааст, худкушӣ кардаанд.

Дар Тел-Авив – пойтахти Исроил ва дигар қаламравҳои ишғолшудаи Фаластин дар моҳҳои ахир эътирозҳои бесобиқа бар зидди сиёсати ҳукумати ин режим бо роҳбарии Бенямин Нетаняҳу ва тасмими охири он барои анҷом додани амалиёти низомӣ бо ҳадафи ишғоли Ғазза доир гардид.

Шаҳракнишинони Исроил мегӯянд, ки Бенямин Нетаняҳу ба ҷои расидан ба созиш ба сари оташбас ва боз гардондани асирон ҷангро тӯлонӣ намудааст.

Артиши Исроил баъди ҳодисаи 7-уми октябр, ки гурӯҳи Ҳамос бо як ҳаракат вориди хоки Исроил шуда, даҳҳо нафарро асир гирифта буд, ҷанг дар Навори Ғаззаро оғоз кард. Аз замони оғози ҷанг дар Навори Ғазза садҳо ғайринизомӣ кушта шуда ва бар асари муҳосираи ин минтақа аз ҷониби Исроил аҳолӣ бо қаҳтӣ ва норасоии об рӯ ба рӯ аст.

Домани ҷанги Исроил бо Навори Ғазза фаротар рафт ва артиши ин кишвар ба Лубнон, Сурия, Эрон низ ҳамла кард. Исроил дар ҷанги 12 – рӯза бо Эрон фармондеҳони раддаи болоии Сипоҳи посдорон ва Артиши Эронро террор кард.

Бо вуҷуди ин, Исроил то ҳол натавонистааст, ки асиронашро аз дасти неруҳои Ҳамос озод кунад. Бо вуҷуди бомбаборони шадид ва ҷанги бидуни қоида, ки қурбониёни он асосан ғайринизомиёнанд, Исроил натавонист ба ҳадафҳои низомии худ даст ёбад.

Dialog.tj