Сайид Аббос Ироқчӣ, вазири корҳои хориҷии Эрон дар посух ба изҳороти садри аъзами Олмон гуфт, ки 100 миллиард евро дар муқоиса бо зарбаи эҳтимолии неруҳои мусаллаҳи Эрон “ба ҳар таҷовузкор ҳеч аст”.

Вазири корҳои хориҷии Эрон дар вокуниш ба изҳороти ахири Фридрих Мертс, садри аъзами Олмон, ҳушдор дод, ки дар сурати ҳамла ба Эрон дигар ҳеч хати сурхе вуҷуд нахоҳад дошт (ҳеч мулоҳизае сурат нахоҳад гирифт).

Ироқчӣ рӯзи шанбе, 31-юми октябр, дар шабакаи иҷтимоии “Х” навишт, ки Мертс ҳангоми оғози ҳамлаҳои ҳавоии ИМА ва Исроил ба Эрон аз ин ҳамлаҳо истиқбол карда буд.

Ба гуфтаи вазири корҳои хориҷии Эрон, садри аъзами Олмон он замон изҳор дошта буд: “Онҳо кори ифлоси Аврупоро анҷом медиҳанд”.

Ироқчӣ бо ишора ба изҳороти ахири Мертс дар бораи зарари иқтисодии даргириҳо ба Аврупо навишт: “100 миллиард евро дар муқоиса бо зарбаи сангин ва харобиоваре, ки неруҳои мусаллаҳи пурқудрати Эрон ба ҳар касе, ки ҷуръати таҷовуз ба миллати моро дошта бошад, ҳеч аст. Дигар ҳеч хати сурхе вуҷуд нахоҳад дошт”.

Қаблан, Фридрих Мертс рӯзи ҷумъа, 30-юми октябр, дар поёни сафараш ба Кореяи Ҷанубӣ, дар робита ба эҳтимоли ҳамлаҳои дубораи ИМА ба Эрон аз тарафҳои даргир хоста буд, ки барои поён додан ба муноқиша роҳи дипломатиро пеш гиранд.

Ӯ таъкид карда буд, ки ин муноқиша аз роҳи низомӣ ҳал намешавад ва Олмон талошҳои дипломатии худро барои ҳарчи зудтар поён ёфтани он тақвият медиҳад.

Мертс ҳамчунин, бо ишора ба паёмадҳои иқтисодии даргириҳо гуфта буд, ки афзоиши нархи неруи барқ то кунун ба Аврупо беш аз 100 миллиард евро зарар расонидааст ва Олмон манфиати муҳимми иқтисодӣ дар поён ёфтани ҳарчи зудтари ин муноқиша дорад.

Dialog.tj