Вазири меҳнат, муҳоҷират ва шуғли аҳолии Ҷумҳурии Тоҷикистон Солеҳа Холмаҳмадзода бо намояндаи навтаъини Хазинаи кӯдакони Созмони Милали Муттаҳид (ЮНИСЕФ) дар Ҷумҳурии Тоҷикистон Габриэлла Ивонна Акимова мулоқот намуд.

Тавре ки маркази матбуоти Вазорати меҳнат, муҳоҷират ва шуғли аҳолии Ҷумҳурии Тоҷикистон хабар медиҳад, ҷонибҳо ба масъалаи фароҳам овардани имкониятҳои бештар барои фарогирии наврасону ҷавонон, бахусус намояндагони оилаҳои осебпазир ва гурӯҳҳои ниёзманд, ба омӯзиши касбу ҳунар таваҷҷуҳи махсус зоҳир намуданд.

“Таъкид гардид, ки рушди низоми касбомӯзӣ, баланд бардоштани малакаҳои касбӣ, ҷалби наврасону ҷавонон ба таҳсилоти ибтидоии касбӣ ва омӯзишҳои кӯтоҳмуддати касбӣ метавонад дар ташаккули малакаҳои зарурӣ, омодагӣ ба бозори меҳнат ва фароҳам овардани замина барои шуғли минбаъдаи онҳо нақши муҳим дошта бошад”, - навиштааст манбаъ.

Гуфта мешавад, ки Вазорати меҳнат, муҳоҷират ва шуғли аҳолии Ҷумҳурии Тоҷикистон ба густариши ҳамкориҳои дуҷониба, таҳкими робитаҳои корӣ ва дастгирии ташаббусҳои муштарак дар самти ҳифзи иҷтимоии аҳолӣ, бахусус кӯдакон ва оилаҳои осебпазир, инчунин фароҳам овардани имкониятҳои касбомӯзӣ ва рушди малакаҳои касбии наврасону ҷавонон омода мебошад.

Dialog.tj