Як шаҳрванди хориҷӣ ҳангоми саёҳат дар ҳудуди ҷамоати деҳоти Ворӯ, деҳаи Ворӯ, аз кӯҳ лағжида, ҷароҳати ҷисмонӣ бардоштааст.

Дар ин бора Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар додааст.

Гуфта мешавад, ки ҷабрдида як сокини 44-солаи шаҳри Екатеренбурги Федератсияи Русия буда, ҳангоми лағжиш аз баландӣ пойашро шикастааст. Ба ӯ дар ҷойи ҳодиса кумаки аввалияи тиббӣ расонида шуда ва сипас ӯро ба беморхонаи минтақавӣ интиқол додаанд.

Дар ин замина, Кумитаи ҳолатҳои фавқулода ва мудофиаи гражданӣ ба сайёҳоне, ки дар минтақаҳои кӯҳӣ гардиш мекунанд, чунин ҳушдор додааст:

Аввалан ҳангоми кӯҳбароӣ ва гардиш дар водӣ қоидаҳои бехатариро ҷиддан риоя кунед. Ҳамеша бо худ таҷҳизоти кумакрасон дошта бошед, то дар ҳолати пеш омадани ин ё он ҳодиса аз он истифода намоед.
Пеш аз оғози сафар ба кӯҳ, хатсайри худро бо мақомоти марбута ҳамоҳанг созед.

Дар ҳолати рух додани ин ё он ҳодисаи нохуш, ҳатман бо телефонҳои +992 93 880 28 74, +992 92 979 06 07 занг занед.

Dialog. tj