Тавре ки Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад, рӯзҳои 2-юм ва 3-юми август дар шаҳри Панҷакент Ниммарафони байналмилалии экологии кӯҳии “Seven Lakes” дар масофаҳои 3, 10 ва 21 км баргузор гардид.

Зикр мегардад, ки дар ниммарафони мазкур 200 нафар дӯстдорони варзиши экологию сайёҳӣ аз 10 давлати ҷаҳон иштирок карданд.

Афзуда мешавад, ки мақсад аз доир кардани Ниммарафони байналмилалии экологии кӯҳии “Seven Lakes” оммавигардонии варзиш, ҷалби мардум ба роҳгардии саломатӣ, рушди сайёҳии экологию варзишӣ, табодули таҷрибаи варзишгарони хориҷию дохилӣ дар чунин чорабиниҳои байналмилалӣ, тарғиби тарзи ҳаёти экологӣ, рушди эко-туризм ва ҷалби ҷавонон ба варзиш мебошад.

Ёдовар мешавем, ки ниммарафони мазкур бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон дар ҳамкорӣ бо Мақомоти иҷроияи ҳокимияти давлатии шаҳри Панҷакент дар доираи татбиқи «Барномаи давлатии маҷмуии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025» доир гардид.

Dialog.tj