Як гурӯҳ таҳлилгарон ва сиёсатшиносони маъруфи Туркия бо интиқоди шадид аз сиёсати тавсеаталабонаи режими Исроил мегӯянд, ки ҳузури ин кишвар дар харитаи ҷаҳон монеаи аслии поёни ҷангҳо дар Ховари Миёна мебошад ва хатаре барои якпорчагии кишварҳои минтақа ба ҳисоб меравад.

Тибқи гузориши расонаҳо, Иброҳим Қарағул – таҳлилгари турк ва нависандаи рӯзномаи “Яни Шафақ” гуфтааст, “Исроил на фақат ба Сурия, балки ба Туркия, Эрон, Лубнон ва Миср низ таҳдид мекунад ва нақша дорад, ки сиёсатҳои таҷовузкоронаи худро дар ин кишварҳо такрор намояд”. Ба гуфтаи Иброҳим Қарағул “хатари Исроил маҳдуд ба ҳамлаҳои низомӣ нест.

Ин режим дорои бемории идеологӣ ва ихтилоли фикрист, ки бояд омӯхта шавад. То замоне, ки номи Исроил дар харитаи географӣ аст, ҷангҳо дар минтақа хотима намеёбанд”.

Ӯ афзуд, ки агар имрӯз Исроил ба Ғазза, Эрон, Лубнон ва Сурия ҳамла мекунад, фардо метавонад Саҳроҳои Сино, Анатолия ва ҳатто Истанбулро низ ҳадаф қарор диҳад. Қарағул ҳушдор дод, ки “Туркия ва дигар кишварҳои минтақа бояд на фақат ба имрӯз, балки ба фардо бияндешанд ва омодагӣ бигиранд”.

Ӯ дар идомаи таҳлилаш ба даргирии миёни ҷангҷӯёни вафодор ба Абумуҳаммад ал-Ҷӯлонӣ, фармондеҳи гурӯҳи террористии "Ҳайат-ат-таҳрир аш-Шом" ва ҷангиёни дарузии минтақаи ас-Сувайдо ишора карда, гуфт, ки режими Исроил дар ин муноқишаҳо ба ҷониби дарузҳо кумак мекунад.

Ӯ аз Анқара даъват намуд, ки “дар ҳолати омодабоши комил қарор гирад ва худро барои ҳар гуна ҳамлаи эҳтимолӣ омода созад”. Ба навиштаи Бадрулқодир Селвӣ, таҳлилгари дигар аз рӯзномаи “Ҳурриёт”, режими Исроил мехоҳад Сурияро ба чор давлатчаи алоҳида барои дарузҳо, алавиҳо ва курдҳо ва аҳли суннат тақсим намояд.

Ин дар ҳолест, ки Тоҳо Оқйул, нависандаи рӯзномаи мухолифи “Қарор” дар матлабе навишт, “Исроил ба география ва сохтори нажодӣ ва мазҳабии минтақа таваҷҷуҳи амиқ дорад ва онро ба як стратегияи ҷиддӣ табдил додааст”.

Ба гуфтаи ӯ, ҳар қадаре, ки минтақа ба сулҳ наздиктар мешавад, “Исроил баҳонаҳояшро барои оғози ҷанг бештар аз даст медиҳад”. Юсуф Зиё Гумурт, таҳлилгари дигар суол мекунад: “Чаро Исроил ба Сурияе, ки робитаҳои худро бо Тел-Авив одӣ кардааст, ҳамла мекунад?” Ва худаш посух додааст: “Зеро ки Сурияи тақсимшуда ва заифшуда ба манфиати дарозмуддати Исроил аст”.

Dialog.TJ