Далер Ҷумъа, вазири энергетика ва захираҳои оби Ҷумҳурии Тоҷикистон рӯзи сешанбе дар мулоқот бо директори генералии ширкати “Газпромнефт- Ноябрскнефтегаз” –и Федератсияи Русия Иван Пётров дар шаҳри Душанбе роҳҳои густариши ҳамкориҳои дуҷонибаро дар соҳаи нафту газ баррасӣ кард.

Ин Вазорат иттилоъ медиҳад, ки ҷонибҳо дурнамои ҳамкории миёни ширкати русии “Газпромнефт-Ноябрскнефтегаз” ва ширкати ватании “Петролеум Суғд” –ро муҳокима намуданд. Гуфтугӯҳо асосан ба таҳияи механизмҳои судманди шарикӣ ва татбиқи муштараки лоиҳаҳои соҳавӣ тамаркуз доштанд.

Вазири тоҷик афзуд, ки ҳар гуна ҳамкории минбаъда бояд бо риояи қонунгузории ҷорӣ ва бо назардошти манфиатҳои стратегии ҳар ду кишвар амалӣ гардад. Ба гуфтаи ӯ, Тоҷикистон омодааст, ки барои густариш ва тақвияти ҳамкориҳо заминаҳои ҳуқуқиву иқтисодӣ шароити муносиб фароҳам оварад.

Иван Пётров низ аз омодагии ширкати русӣ барои вусъат бахшидан ба ҳамкории энергетикӣ бо Тоҷикистон изҳори қаноатмандӣ кард. Ӯ гуфт, ки “Газпромнефт-Ноябрскнефтегаз” манфиатдор аст, дар ташаккули бозори муштараки энергетикӣ ва таҳқиқи имконоти захираҳои тозаи нафту газ дар Тоҷикистон саҳм гирад.

Ду ҷониб ба созиш расиданд, ки дар ояндаи наздик гурӯҳи кории муштарак таъсис дода шавад, то роҳҳои амалӣ кардани лоиҳаҳо дар бахши нафту газ таҳия ва мавриди баррасӣ қарор гирад.

Ин дидор дар ҳолест, ки Тоҷикистон солҳои ахир талош дорад, ба воситаи ҷалби сармоягузории хориҷӣ ва шурои шарикӣ бо ширкатҳои бонуфузи байналмилалӣ, соҳаи энергетикии кишварро рушд диҳад ва диверсификатсия намояд.

Dialog.tj