Доналд Трамп, раиси ҷумҳури Иёлоти Муттаҳида, бо интиқод аз идомаи ҳамлаҳои Украина ба полоишгоҳҳои нафти Русия, иддао кардааст, ки Владимир Зеленский, раиси ҷумҳури Украина, майли поён додани ҷангро надорад.

Трамп дар паёме дар шабакаи иҷтимоии худ “Трут Сошал” (Truth Social) гуфтааст, ки барои барқарории сулҳ дар ҷанги миёни Маскав ва Киев музокира мекунад.

Ӯ дар бораи мавқеи худ дар қиболи Русия навиштааст: “Қарори ман дар бораи Русия бисёр сода аст: намехоҳам коре анҷом диҳам, ки аз рӯйи аҳмақӣ Русияро аз мизи музокира дур кунад”.

Трамп дар идома бо ишора ба ҳамлаҳои Украина ба полоишгоҳҳои сӯзишвории дизелии Русия гуфтааст, ки Зеленский медонад, ин ҳамлаҳо ба бозорҳои ҷаҳонии дизел, аз ҷумла бозори Иёлоти Муттаҳида, осеби ҷиддӣ мерасонанд.

Ба гуфтаи раиси ҷумҳури ИМА, кишоварзон, чорводорон ва соҳибкорони соҳаҳои гуногун аз ин вазъият зарари зиёд мебинанд. Ӯ ҳамзамон таъкид кардааст, ки Русия бо вуҷуди ин вазъ миллионҳо бушка сӯзишвории дизелиро бо нархи арзон ба бозорҳои ҷаҳон пешниҳод мекунад.

Трамп: “Зеленский метавонист ду сол пеш ба созиши беҳтаре бирасад”

Трамп бо ишора ба маблағҳое, ки Аврупо ба Зеленский медиҳад ва кумаки маъмурияти пешини Ҷо Байден ба Украина, иддао кардааст, ки раиси ҷумҳури Украина майли поён додани ҷангро надорад ва эҳтимол аз ибтидо низ чунин майле надоштааст.

Раиси ҷумҳури ИМА ҳамчунин, гуфтааст, ки Зеленский метавонист ду сол пеш нисбат ба шароити кунунӣ ба созиши беҳтаре даст ёбад.

Ӯ бо тавсифи вазъи кунунии Украина изҳор доштааст, ки кишвар хароб шудааст, бахши бузурге аз қаламрави худро аз даст додааст ва шумораи мардони он кам шудааст. Ба гуфтаи Трамп, бархе аз онҳо захмӣ шудаанд ва бархеи дигар ҷони худро аз даст додаанд.

Трамп дар поёни паёми худ таъкид кардааст: “Ман мехоҳам ин ҷанг ба поён расад”.

Ҳушдори “Блумберг” аз эҳтимоли заиф шудани равобити Киев ва Вашингтон

Хабаргузории «Блумберг» қаблан дар гузорише бо ишора ба идомаи ҳамлаҳои Украина ба полоишгоҳҳои нафти Русия навишта буд, ки ин иқдомҳо метавонанд ба равобити Киев ва Вашингтон осеб расонанд.

Ин хабаргузорӣ ба созиши ахири Трамп ва Владимир Путин, раиси ҷумҳури Русия, дар бораи иҷозаи муваққатии воридоти сӯзишвории дизелӣ аз Русия ба Иёлоти Муттаҳида ишора кардааст.

Ба гузориши “Блумберг”, Трамп рӯзи шанбе, 17-уми октябр ба хабарнигорон гуфтааст, ки Зеленский метавонист борҳо низоъ бо Русияро ҳаллу фасл кунад, аммо тасмим гирифтааст, ки чунин накунад.

Бар асоси ин гузориш, раиси ҷумҳури ИМА ҳамчунин, гуфтааст, ки Украина ба роҳбарияти нав ниёз дорад ва хостори қатъи ҳамлаҳои Киев ба полоишгоҳҳои нафти Русия шудааст.

Dialog.tj