Президенти Ҷумҳурии Қирғизистон Садир Жапаров як қатор сафарҳои муҳимми расмӣ ба Ҷумҳурии Тоҷикистон анҷом додааст, ки ҳадафи асосии он таҳкими робитаҳои дуҷониба ва рушди ҳамкориҳои минтақавӣ будааст.

Садир Жапаров бо даъвати Президенти Ҷумҳурии Тоҷикистон муҳтарам Эмомалӣ Раҳмон бо сафари давлатӣ ба Тоҷикистон омад. Дар барномаи ин сафар музокироти дуҷониба, мулоқот бо раисони ҳар ду палатаи парлумон ва сарвазир, имзои як қатор ҳуҷҷатҳои байнидавлатӣ, ҳамчунин, баёнияи муштараки сарони давлатҳо дар назар дошта шудааст.

Ин сафари Садир Жапаров дар посух ба сафари давлатии Эмомалӣ Раҳмон сурат гирифт, ки дар моҳи марти соли 2025 ба Қирғизистон анҷом гирифта буд. Дар он вақт рӯйдоди асосӣ имзои Созишнома дар бораи сарҳади давлатӣ миёни Қирғизистон ва Тоҷикистон ва қарори аз сар гирифтани фаъолияти гузаргоҳҳои марзӣ буд.

Сафари расмии аввалини Садир Жапаров ба Тоҷикистон дар мақоми президенти Қирғизистон 28-29-уми июни соли 2021 сурат гирифта буд. Ин сафар дар пайи гуфтугӯи телефонии ӯ бо Эмомалӣ Раҳмон сурат гирифт, ки ба вазъияти танишзо дар марзи Қирғизистон ва Тоҷикистон бахшида шуда буд.

Дар ҷараёни ин сафари расмӣ мулоқоти рӯ ба рӯи сарони ду кишвар ва сипас музокироти васеъ бо ҳайатҳо доир гардид. Эмомалӣ Раҳмон бар зарурати ҳамкории созанда ва рушди робитаҳои дуҷониба таъкид намуд. Дар ҳамин ҳол Садир Жапаров омодагии худро барои пешгирӣ аз такрори муноқишаҳо ва таҳкими робитаҳои бародарона миёни ду мардум изҳор дошт.

17-18-уми сентябри соли 2021 Садир Жапаров дар нишастҳои сарони кишварҳои аъзои Созмони ҳамкории Шанхай ва Созмони Аҳдномаи амнияти дастаҷамъӣ, ки дар шаҳри Душанбе доир шуданд, ширкат кард. Дар ин ҳамоишҳо роҳбарони кишварҳои аъзо, кишварҳои нозир ва шарикони муколама ширкат варзида, масъалаҳои амният ва ҳамкории минтақавӣ баррасӣ шуданд.

14-15-уми сентябри соли 2023 Садир Жапаров дубора ба Душанбе ташриф овард. Ин навбат барои ширкат дар панҷумин мулоқоти машваратии сарони кишварҳои Осиёи Марказӣ.

Дар доираи ин сафар ӯ бо Эмомалӣ Раҳмон мулоқоти дуҷониба анҷом дод. Дар он мулоқот доираи васеи масъалаҳо, аз ҷумла масъалаи таъйин ва аломатгузории сарҳади давлатӣ баррасӣ шуд. Сарони кишварҳо ба зарурати муколамаи сиёсӣ ва рушди ҳамсоягии нек таъкид карданд.

31-уми марти соли 2025 Президенти Қирғизистон Садир Жапаров ба шаҳри Хуҷанд барои ширкат дар саммити сеҷонибаи Қирғизистон, Тоҷикистон ва Ӯзбекистон ташриф овард.

Дар майдони ҳавоӣ президенти Тоҷикистон Эмомалӣ Раҳмон ӯро истиқбол гирифт. Дар ҷараёни ин сафар музокироти дуҷониба доир шуд, ки дар он масъалаҳои ҳамкории иқтисодиву тиҷоратӣ, энергетика ва робитаҳои фарҳангию инсонпарварона муҳокима шуданд. Сарони давлатҳо протоколеро оид ба мубодилаи санадҳои тасдиқкунанда имзо карданд, ки созишнома дар бораи сарҳади давлатӣ миёни ду кишварро ба таври расмӣ таъйид менамояд.

Дар доираи ҳамин ҳамоиш, президентҳои Қирғизистон, Тоҷикистон ва Ӯзбекистон Созишномаи таъйини нуқтаи сеҷонибаи марзи давлатӣ миёни кишварҳоро ба имзо расониданд.

Dialog.tj