Расонаҳои Исроил навиштанд, ки дар пайи ҳамлаҳои мушакии шадиди шаби гузаштаи Эрон сокинони Исроил ба ваҳшат афтода, роҳи хориҷ шудан аз Исроилро меҷӯянд. Бархе аз сокинони Исроил аллакай бо қаиқҳо ва бо қабул намудани роҳи пурхатар аз тариқи баҳр ба минтақаи Қибрис дар наздикии Юнон фирор кардаанд.

Хабаргузории “Тасним”-и Эрон навишт, дар ҳоле ки фурудгоҳҳои режими Исроил аз тарси ҳамлаи мушакии Эрон баста аст ва ҳукумат хориҷ шудан аз Исроилро манъ кардааст, садҳо исроилӣ пинҳонӣ ба воситаи қаиқҳо дар ҳоли фирор аз ин кишвар мебошанд.

Рӯзномаи “Ҳааретс” шаби гузашта хабар дод, шумораи онҳое, ки ба ҷойи ҳавопаймо бо роҳҳои дигар рӯ ба фирор овардаанд, афзоиш меёбад. Ин рӯзнома менависад, ки сокинони Исроил розӣ нестанд, ки ҳувияти худро ошкор кунанд. Онҳо гуфтаанд, дигар роҳе надоранд ва бояд аз роҳҳои пинҳонӣ фирор кунанд.

Ин расонаи исроилӣ навиштааст, ки бисёре аз исроилиҳо имконияти истифода аз қаиқҳои баҳриро надоранд. Капитанҳои қаиқҳо гуфтаанд, ҳатто онҳое, ки имконият надоранд, бо ҳар мушкиле мехоҳанд Исроилро тарк кунанд.

Тибқи иттилоъ, бандари баҳрии Ҳерзлияи Исроил дар рӯзҳои гузашта ба маркази фирори пинҳонии исроилиҳо табдил шудааст. Сокинони Исроил фақат бо як чамадон ба қаиқҳо савор мешаванд ва ба сӯи Қибрис ва дигар минтақаҳо фирор мекунанд.

Хароҷоти сафар бо қаиқҳо хеле зиёд аст ва фақат афроди сарватманд метавонанд аз он истифода намуда, ҷони худро наҷот диҳанд.

Рӯзномаи “Ҳааретс” бо ишора ба баста шудани фазои ҳавоии Исроил ва интиқоли даҳҳо ҳавопаймо ба кишварҳои хориҷӣ аз ҷониби ҳукумати Исроил, бо мақсади  пешгирӣ аз нобудшавӣ бо мушакҳои Эрон навишт, ки миллионҳо исроилӣ дар маърази ҳамлаҳои мушакии Эрон қарор доранд.

Ин рӯзнома менависад, дар бандарҳои дигар, аз ҷумла Ҳайфо, Асқалон низ соҳибони қаиқҳои баҳрии хурд сафарҳоро барои фирори исроилиҳо созмондиҳӣ кардаанд ва нархи он хеле гарон аст.

“Онҳое ки мехоҳанд фирор кунанд, мегӯянд дигар намехоҳанд дар Исроил зиндагӣ кунанд ва мехоҳанд ба кишварҳое баргарданд, ки аз он ҷо омада буданд ва дар канори фарзандону наздиконашон бошанд. Ҷолиб он аст, ки фақат теъдоди ками исроилиҳо иқрор мекунанд, ки аз тарси мушакҳои Эрон фирор мекунанд, зеро касе ҷуръат намекунад дар ин хусус ошкоро сухан гӯяд”- менависад ин рӯзнома.

Яке аз капитанҳои қаиқ бо номи мустаори Муше гуфтааст: “Имрӯз баҳр тамоман ором нест. Сафар ба Қибрис бо қаиқи хурди баҳрӣ хатарнок аст. Медонед, ки дар баҳр чӣ шуморо метавонад интизор бошад? Мавҷҳои шадид, ҳолати бад, дилбеҳузурӣ ва ғайра. Дар асл исроилиҳо намедонанд, дар баҳр чӣ онҳоро интизор аст, аммо бо вуҷуди ин мехоҳанд фирор кунанд”.

Сокинони исроилӣ гуфтаанд, ки дар аввал қаиқронон барои интиқоли мусофирон 2500 шекел (воҳиди пули Исроил) мехостанд ва ҳоло бошад 6000 шекел талаб мекунанд.

“Ҳааретс” навишт, як оила бо фарзанди худ, ки мунтазири савор шудан ба қаиқ буданд, хомӯшона эътироф намуданд, ки бо сабаби ҷанг Исроилро тарк мекунанд: “Мо воқеан аз мушакҳо тарс дорем ва дигар хаста шудем”.

Dialog.tj