Созмони Милали Муттаҳид раванди амниятии нави Исроил барои интиқоли кумакҳои башардӯстона ба Навори Ғаззаро “тӯлонӣ, печида ва хатарнок” тавсиф кардааст.

Исроил ҳафтаи гузашта, бо вуҷуди мухолифат ва танқидҳои шадиди байналмилалӣ ҳамлаҳои нави худро дар Навори Ғазза оғоз кард, ки дар натиҷаи он 85 нафар кушта шуданд. Исроил гуфтааст, ки ҳадафи оғози амалиёт озод кардани асирон ва баргардондани онҳо ба хонаводаҳояшон аст. Аз замони оғози ҳамлаҳои ҷадиди Исроил 300 нафар дар Навори Ғазза кушта шудаанд.

Дар пайи афзоиши фишорҳои байналмилалӣ Исроил эълон кард, ки иҷоза медиҳад рӯзи душанбе 5 камаз ва рӯзи сешанбе 93 камаз кумакҳои башардӯстона вориди Навори Ғазза шавад. Бо вуҷуди ин, сухангӯи Созмони Милали Муттаҳид эълон кард, ки ин кумакҳо ҳанӯз ба Навори Ғазза нарасидааст.

“Ҳеч кадом ин кумакҳо воқеан ба фаластиниҳо нарасидааст ва раванди таъмини амниятӣ барои расондани кумакҳо ба анборҳои мавриди ниёз тӯлонӣ, печида, душвор ва хатарнок аст” – гуфт Стефан Дюжаррик, сухангӯи Созмони Милал.

Стефан Дюжаррик гуфтааст, ки мақомоти амнияти Исроил дастур додаанд, ки бори комюҳоро холӣ кунанд ва дубора бор кунанд ва бо ин сабаб вақти зиёдеро гирифта ва сабаби нарасидани кумакҳои башардӯстона шудаанд.

Созмони Милали Муттаҳид гуфтааст, ки шароити эҷодкардаи амниятии Исроил монеаи ҷиддӣ барои расондани кумакҳои башардӯстона дар Навори Ғазза аст. Ин созмон эълон кардааст, ки дар чанд рӯз фақат даҳ камаз кумакҳои башардӯстона иҷозати ворид шудан ба Навори Ғаззаро ёфтаанд ва ин дар ҳолест, ки дар замони оташбаси гузашта беш аз 600 камаз кумакҳои башардӯстона вориди ин минтақа мешуд. Ин созмон мегӯяд, ки аҳолии 2, 1 миллион нафарии Ғазза ба маводи ниёзи аввалия, ғизо ва дору сахт ниёз доранд.

Дар пайи амалҳои худсаронаи Исроил кишвари Британия эълон кард, ки муоҳидаи тиҷорати озод бо ин кишварро бекор намуда, як қатор таҳримҳои шадидро бар зидди шаҳракнишинони яҳудӣ дар Каронаи Бохтарӣ ҷорӣ хоҳад кард. Ин иқдом пас аз изҳороти муштараки Британия, Фаронса ва Канада ба шеваи амалкарди Исроил дар Ғазза ва Каронаи Бохтарӣ гирифта шуд.

Dialog.tj