Эмомалӣ Раҳмон, президенти Ҷумҳурии Тоҷикистон субҳи панҷшанбе, 8-уми май ба муносибати ҷашни 80-солагии Ғалаба дар назди Оташи абадӣ гулчанбар гузошта, дар маросими паради ҳарбӣ ширкат ва суханронӣ намуданд.

Дар ҷараёни маросими гулчанбаргузорӣ ва парадаи ҳарбӣ масъулони баландпояи ҳукумати кишвар, аз ҷумла Рустами Эмомалӣ, раиси шаҳри Душанбе ва раиси Маҷлисии миллии Маҷлиси Олии Ҷумҳурии Тоҷикистон, Эмомалӣ Собирзода, вазираи дифои Ҷумҳурии Тоҷикистон ва дигар масъулони расмии кишвар ширкат намуданд.

Президенти кишвар дар суханронии табрикотии хеш таъкид карданд, ки ғалаба бар “вабои фашизм” бо шарофати дӯстӣ, бародарӣ ва ҳамбастагии халқҳои Иттиҳоди Ҷамоҳири Шӯравӣ муяссар гардид.

Сарвари давлат дар суханронии худ ба оқибатҳои фоҷеабори Ҷанги Бузурги Ватанӣ ишора намуда, ба наслҳои имрӯз ва оянда муроҷиат намуданд.  Президенти кишвар таъкид карданд, ки дӯстиву бародарӣ ва ҳамёриву дастгирии миллатҳои мухталифи Иттиҳоди Ҷамоҳири Шӯравии пешин заминаи шикасти истилогарон ва пешгирӣ аз густариши вабои фашизмро дар асри XXI фароҳам намуд.

“Боиси ифтихори мо аст, ки барои расидан ба ин пирӯзӣ дар баробари дигар миллатҳо мардону занони бонангу номуси Тоҷикистон низ саҳми муассиру сазовор гузоштанд” – таъкид намуданд Сарвари давлат.

Сарвари давлат оид ба саҳими тоҷикон дар Ҷанги Бузурги Ватанӣ махсус ёдовар шуда, таъкид карданд, ки дар он замон беш аз 300 ҳазор ба майдони набард сафарбар шуданд, ки 50 дарсади аҳолии қобили меҳнати ҷумҳуриро ташкил медоданд. Таъкид шуд, ки аз ҳисоби тоҷикон беш аз 100 ҳазор кушта, 40 ҳазор нобуд ва 60 ҳазор дар ин ҷанг захмӣ шуданд.

Президенти кишвар таъкид намуданд, ки номи неку хизматҳои онҳое, ки аз ҷанг барнагаштанд, ҳаргиз фаромӯш намешавад ва эҳтироми онҳое, ки бо пирӯзӣ ба Ватан баргаштанд, ҳамеша пос дошта хоҳад шуд. Таъкид гадид, ки дар Ҷанги Бузурги Ватанӣ 58 ҳазор афсару сарбози тоҷик ба ордену медалҳо ва 55 нафари онҳо барои ҷоннисорӣ ва мардонагӣ ба унвони олии Қаҳрамони Иттиҳоди Шӯравӣ мушарраф шуданд.

“Мардуми мо дар ҳоле, ки худашон гурусна буданд, ба майдони ҷанг озуқаворӣ, сару либос ва маблағ мефиристоданд”- таъкид намуданд Сарвари давлат.

Dialog.tj