Мақомоти соҳаи маорифи Федератсияи Русия бо як қарор талаб кардани маълумотнома дар хусуси бемориҳои сироятӣ барои қабули кӯдакони муҳоҷирон дар муассисаҳои томактабии Русияро ҳатмӣ карданд. Дар ин хусус қарори Вазорати маориф ва илми Федератсияи Русия содир шуд.

Бар асоси иттилои расонаҳо, дар қарори Вазорати маорифи Русия зикр шудааст, ки падару модар ё намояндагони қонунии кӯдак вазифадоранд маълумотномаи тиббӣ дар хусуси бемориҳои сироятие, ки ба атрофиён хатар эҷод мекунад, пешниҳод намоянд.

Рӯйхати бемориҳое, ки аз сӯйи ҳукумати Русия қабул шудааст, инҳо мебошанд: сил, сифлис, вируси норасоии бадан ва лепра.

Вазорати маорифи Федератсияи Русия таъкид кардааст, ки ин навоварӣ барои амнияти эпидемологии ҳамаи кӯдакони кӯдакистон ва танзими раванди қабули кӯдакони шаҳрвандони хориҷӣ амалӣ карда мешавад.

Ғайр аз ин маълумотнома падару модар ё намояндагони қонунӣ нусхаҳои санадҳои тасдиқкунандаи ҳувияти кӯдак, санадҳои будубоши қонунӣ дар қаламрави Федератсияи Русия ва санадҳои исботкунандаи муносибати хешовандиро бояд пешниҳод кунанд.

Ҳама санадҳо бояд ба забони русӣ таҳия шуда бошад ва ё тарҷумаи дар нотариалӣ тасдиқшудаи он пешниҳод гардад.

Dialog.tj