Вазири корҳои хориҷии пешини Эрон Муҳаммадҷавод Зариф дар пайи хабари оғози музокироти ҳастаии Эрон ва Амрико бо хурсандӣ навишт, ки Эрон интихоби дуруст анҷом додааст.

Муҳаммадҷавод Зариф дар саҳифаи худ дар шабакаи иҷтимоии “Х” навишт, “боиси хурсандист, ки Аббос Ироқчӣ, вазири корҳои хориҷии Эрон, масъули музокироти ҳастаӣ бо Амрикост” ва “агар гурӯҳи амрикоӣ низ бо ҳамин ирода ва бо эҳтиром ба ҳуқуқ ва манфиатҳои мардуми Эрон вориди музокира шавад”, ҳаракати хуб хоҳад буд.

“Эрон интихоби дуруст анҷом дод. Акнун навбати Иёлоти Муттаҳидаи Амрико аст, ки дар ин озмоиши сарнавиштсоз барои сохтани ояндаи беҳтар барои минтақа ва ҷаҳон саҳм гирад” - афзуд Ҷавод Зариф.

Дар пайи эълони расмии оғози музокираи Эрон ва Амрико, Дмитрий Песков, сухангӯи Кремл гуфт, ки Русия аз гуфтугӯҳои мустақим ва ғайримустақими миёни Теҳрон ва Вашингтон дар хусуси Барномаи ҳастаии Эрон истиқбол мекунад.

“Мо аз ҳар гуна роҳи ҳалли дипломатӣ ва сиёсӣ, ки метавонад ба коҳиши таниш миёни Эрон ва Иёлоти Муттаҳидаи Амрико мусоидат кунад, пуштибонӣ мекунем” – гуфт Дмитрий Песков.

Доналд Трамп дар нишасти хабарӣ бо сарвазири Исроил Бенямин Натаняҳу гуфт, ки мақомоти олии Амрико ва Эрон рӯзи шанбе дар Уммон музокироти мустақимро оғоз хоҳанд кард.

Бар асоси иттилои бархе расонаҳо рӯзи шанбе Стив Витков, намояндаи Доналд Трамп ва Аббос Ироқчӣ, Вазири корҳои хориҷии Эрон дар шаҳри Масқати Уммон дар хусуси Барномаи атомии Эрон музокироти мустақимро оғоз хоҳанд кард.

Dialog.tj