Нахустин саммити сеҷонибаи сарони кишварҳои Тоҷикистон, Ӯзбекистон ва Қирғизистон 31–уми март дар шаҳри Хуҷанди вилояти Суғди Ҷумҳурии Тоҷикистон баргузор хоҳад шуд.

Эдил Байсалов дар ҷараёни нишасти сессияи 58-ум ва сигменти сатҳи баланди Шурои ҳуқуқи инсон дар Женева дар хусуси нахустин саммити сеҷонибаи сарони кишварҳои Тоҷикистон, Қирғизистон ва Ӯзбекистон хабар дод. Сарвазири Қирғизистон гуфт, саммити мазкур як қадами муҳим дар таҳкими ҳамкориҳои минтақавӣ хоҳад буд.

Ҳафтаи қабл, раиси Кумитаи давлатии амнияти миллии Тоҷикистон Саймумин Ятимов ва раиси Кумитаи давлатии амнияти миллии Қирғизистон Қамчибек Ташиев созишномаи ниҳоии сарҳади давлатиро имзо намуданд. Бар асоси меъёри ҳуҷҷатгузорӣ созишнома доир ба аломатгузории сарҳади давлатӣ миёни Тоҷикистон ва Қирғизистон бояд аз сӯйи сарони ин ду кишвар имзо шавад.

Рӯзи 21-уми феврал Саймумин Ятимов ва Қамчибек Ташиев созишномаи муҳим ва ниҳоиро дар робита ба сарҳади давлатӣ имзо карданд:

Созишномаи марзи давлатӣ;

Созишномаҳои байниҳукуматӣ дар бораи иншооти энергетикӣ ва захираҳои об;

Созишнома дар бораи истифодаи роҳҳои байнидавлатӣ ва бунёди роҳҳои нав.

Бар асоси иттилоъ, ҳуҷҷатҳо барои имзо намудани роҳбарони ду кишвар омода шудаанд.

Dialog.tj