Дар доираи силсилаи барномаҳои “Шабҳои дипломатӣ” “Шаби Тоҷикистон” бо ҳузури масъулони сафорати Тоҷикистон дар Эрон, мақомоти расмии Эрон, фарҳангиён ва дӯстдорони Тоҷикистон баргузор гардид.

“Шаби Тоҷикистон” бо ташаббуси Муассисаи фарҳанг ва ҳунари “Ҳуршед” зери роҳбарии Ҳуҷатуллоҳ Аюбӣ ва сафири Ҷумҳурии Тоҷикистон дар Эрон Низомиддин Зоҳидӣ доир гашт.

Дар сароғози маҳфили фарҳангӣ ва адабии “Шаби Тоҷикистон” Ҳуҷатуллоҳ Аюбӣ, раиси Муассисаи фарҳангӣ ва ҳунарии “Ҳуршед” таъкид кард, ки дар диёри мо, дар сарзамини азизамон арзишмандтарин сармоя фарҳанг, адаб ва ирфон аст.

“Агар имрӯз андешамандони бузург ба ин натиҷа расиданд, ки фарҳанг ҷудо аз хосиятҳои санъати сармоя аст, бояд гӯям, ки Фирдавсӣ – бузурги эронзамин дар давраи ҳаёти худ чунин гуфта “фарҳанг роиши ҷон бувад”.

Раиси Муассисаи фарҳангӣ ва ҳунарии “Ҳуршед” Ҳуҷатуллоҳ Аюбӣ бо таъкиди ин ки дипломатияро бо лаззати фарҳанг дӯст доранд, чунин афзуд: “Барои он талошҳои бисёр анҷом шудааст. Барномаи “Шаби Тоҷикистон” яке аз ҳамон бешумор талошҳоест, ки дар масири ишқ варзидан ба фарҳанги кишварамон ва ҳамчунин, ёдоварии иштирокоти фарҳанги Эрон ва Тоҷикистон барпо шудааст”.

Мир Ҷалолуддин Каззозӣ, устоди забон ва адаби форсӣ дар маҳфили “Шаби Тоҷикистон” суханронӣ карда, гуфт, ин базм ба поси Эрон ва Тоҷикистон сомон дода шудааст - базмест дилпазир, навидбахш ва умедофарин.

“Мо ҳар ду яке ҳастем. Ду кишвар- як сарзамин. Ман мехоҳам дар ин гуфтор ба пайванди Эрон ва Тоҷикистон андаке бипардозам. Ба ростӣ, пайванди ин ду кишвар чӣ гуна аст? Ба чӣ пояҳое устувор шудааст? Аз он рӯй, ки посухе санҷида, сохта ва устувору донишварона битавонем, ба ин пурсиш посух дод, ба ночор мебояд пурсиши дигареро нахуст посух диҳем. Он пурсишҳоро посух надиҳем ва ин андешаро ба сомону саранҷом нарасонем, наметавонем пурсиши нахустинро ҳам посухи барозанда, дарохур ва пазируфтанӣ диҳем” –гуфт Мир Ҷалолуддини Каззозӣ.

Донишманди эронӣ дар идома афзуд, ки Эрон ва Тоҷикистон сарзаминҳои бисёреро дар бар мегиранд: “Ман дар сухане, ки чанде қабл таъкид кардам, кӯтоҳан ба ин замина пардохтам. Сухани ман дар ин базм дар бораи Эрон буд. Гуфтам мо чанд Эрон дорем. Яке Эрони фармонравоён аст. Эрони сиёсӣ аст. Ин Эрон хурдтарин, тангтарин гунаи Эрон аст. Эроне, ки ҳамакнун дар он мезием. Ин сухан ниёзе ба гуфтан нест ва Тоҷикистонро мебарозад. Эрони дигар чист? Эрони таърихӣ. Бисёр паҳновар. Эроне, ки чанд ҷаҳоншоҳии бузургро дар худ падид овардааст. Ҷаҳоншоҳии Ҳахоманишӣ, Ашконӣ, ҷаҳоншоҳии Сосонӣ” –афзуд Каззозӣ.

Парисо Сомонӣ, рӯзноманигори эронӣ низ дар ин чорабинӣ ҳузур дошт ва аз он гузорише навишт: “Шаби Тоҷикистон” – “Духтарон ва писарони кӯчак бо либосҳои тоҷикӣ ва кӯлоҳҳои кӯчаки рангин бар сар, ки нишон аз ҳувияти тоҷикии онҳо буд, аз меҳмонии бузурги Эрон ва Тоҷикистон худнамоӣ мекард”.

Dialog.tj