Тибқи иттилои Маркази робитаҳои ҷамъиятии Сарраёсати иҷрои ҷазои ҷиноятии Вазорати адлия 3-юми феврал, соати 15:44 гурӯҳе иборат аз 9 маҳбуси Муассисаи ислоҳии №3/2-и Сарраёсати иҷрои ҷазои ҷиноятии Вазорати адлияи Ҷумҳурии Тоҷикистон бо истифода аз асбобҳои худсохти халандаю бурранда, ба нигаҳбонҳои муассисаи ислоҳотӣ ҳуҷуми ҳалокатовар карданд.

Гуфта мешавад, ки зиндониёни ҳуҷумгар ба талаботи қонунии маъмурияти муассиса итоат накарда, бо истифода аз кордҳои худсохти оҳанини нӯгтез талош карданд, ки сарбозони ҳифозатии муассисаро ба қатл расонида, фирор намоянд. Дар натиҷа, ба 3 корманд, ки ба иҷрои вазифаҳои хизматӣ машғул буданд, ҷароҳатҳои вазнини ҷисмонӣ расонидаанд.

Бинобар иттилои манбаъ, муҳофизон тибқи қонун ва дастурамали хизматӣ амал намуда, маҷбур гаштанд, ки дар муқобили ҷинояткорон аз силоҳи оташфишон истифода баранд. Дар натиҷа, 3 ҷинояткор безарар ва боқимондаи онҳо дастгир карда шуданд. Ҳамзамон, ба захмбардоштагон саривақт ёрии тиббӣ расонида шуд. Вазъи саломатии онҳо муътадил арзёбӣ гардида, низоми нигаҳдошт ва ҳимояи муассиса пурра барқарор шудааст.

Dialog.tj