Вазорати корҳои дохилии Имороти Муттаҳидаи Арабӣ эълон намуд, ки ба гумони қатли хохоми яҳудӣ Тсви Коган се нафар ӯзбекистониро боздошт кардааст. Хохоми яҳудӣ Тсви Коган як ҳафта пеш дар Имороти Муттаҳидаи Арабӣ нопадид шудааст, ки 2 рӯз қабл ҷасадаш пайдо гардидааст.

Вазорати корҳои дохилии Имороти Муттаҳидаи Арабӣ рӯзи 25-уми ноябр иттилоъ дод, ки се нафар шаҳрванди ӯзбекистонӣ – Азизбек Комиловичи 33-сола, Олимбой Тоҳирович ва Маҳмудҷон Абдураҳими 28 – соларо ба гумони қатли руҳонӣ ё хохоми яҳудӣ боздошт кардаанд.

Мақомоти интизомии Имороти Муттаҳидаи Арабӣ зикр намуданд, ки хохоми яҳудӣ Тсви Коган бо шиносномаи кишвари Малдавия вориди хоки ин кишвар шудааст. Гуфта мешавад, ки ӯ шаҳрвандии кишвари Исроил ва Малдавияро доштааст.

Дар баёнияи Вазорати корҳои дохилии Имороти Муттаҳидаи Арабӣ чунин омадааст: “Мо тавоноии бархӯрди қотеъ бо ҳар касе, ки талош кунад, амнияту суботи ҷомеаро барҳам бизанад, дорем. Тамоми паҳлӯҳои пинҳони ин ҳодиса пас аз поёни таҳқиқот иттилоърасонӣ хоҳад шуд.

Мақомоти амниятии Исроил қаблан кишвари Эронро ба қатли хохоми яҳудӣ муттаҳам намуда буданд. Баъди фош шудани ҳувияти қотилон мақомоти исроилӣ гуфтаанд, ки дар қатли руҳонии яҳудӣ гурӯҳи Ҳамос даст дорад.

Бенёмин Натанёҳу, сарвазири Исроил гуфт, ки кушта шудани Тсви Коган, хохоми яҳудӣ дар Иморот як ҳамлаи “муҷримона, террористӣ ва яҳудситезона” аст.

“Исроил бо тамоми абзорҳо амал мекунад ва сабабгарони қатли Тсви Коганро ба дасти адолат хоҳад супурд ва дар муқобили онҳо ҳеч гузаште нахоҳад дошт” –афзуд сарвазири Исроил.

Dialog.tj