Шерзод Шерматов, вазири технологияҳои рақамии Ӯзбекистон дар ҷараёни сафари худ ба давлати Қатар бо муовини директори иҷроияи корпоратсияи “Mannai” Холид Маннаӣ ва раиси корпоратсия Алех Гревал ва ноиби калони президенти “Mannai InfoTech” Бану мулоқот намуда, як қатор масъалаҳои муҳимми равобити дуҷонибаро мавриди гуфтугӯ қарор дод.

Ҷонибҳо дар ҷараёни мулоқот масъалаи ташкил намудани маркази офшорӣ барои пешниҳоди хизматрасониҳо дар соҳаи технологияҳои иттилоотӣ дар Ӯзбекистонро баррасӣ намуданд. Дар ин хусус, Вазорати технологияҳои рақамии Ӯзбекистон хабар додааст.

Дар ҷараёни имзои шартнома ҷонибҳо ба рушди лоиҳаи махсус, ки дар ҳамкорӣ бо корпоратсияи “Mannai” ва дигар ширкатҳои IT-и Қатар таҳия мегарад, таваҷҷуҳи хоса зоҳир намуда, ба тақвияти он таъкид намуданд. Гуфта мешавад, ки мақсади лоиҳа баланд бардоштани сатҳи тахассуси кормандон ва кам кардани хароҷоти ба кор қабул кардан мебошад.

Дар ин мулоқоти Вазорати технологияҳои рақамии Ӯзбекистон ва корпоратсияи “Mannai” масъалаи таъсиси маркази таълимӣ оид ба технологияҳои иттилоотӣ низ мавриди муҳокима қарор гирифтааст.

Дар охир ҷонибҳо меморандуми ҳусни тафоҳумро имзо намуданд.

Dialog.tj