Як ҷавони 19-сола дар шаҳри Самарқанд барои паҳн намудани таронаҳои мазҳабӣ аз тариқи шабакаи иҷтимоии “Телеграм” 3 сол ба зиндон маҳкум шуд.

Гуфта мешавад, ки худи ҷавон ҳангоми тафтишот иброз намудааст, ки ӯ мазмуни таронаҳои мазҳабиро намефаҳмид.

Ин ҷавон сокини ноҳияи Нурободи шаҳри Самарқанд мебошад.

Тибқи маводи парванда ӯ дар шабакаи “Телеграм” гурӯҳеро созмон дода ва дар месенҷери гурӯҳ таронаҳои мазҳабиро нашр мекардааст. Бар асоси арзёбии мақомоти судӣ таронаҳои бознашркардаи ҷавон дорои муҳтавои ифротгароӣ ва радикалӣ мебошанд.

Маҳкумшуда дар додгоҳ чунин гуфтааст: “Ман ин сурудҳоро дар шабакаҳои гуногун шунидам, онҳо ба ман писанд омад ва ба гурӯҳе гузоштам ва муҳтавои онро намефаҳмидам. Ман арабиро намедонам, танҳо оҳангҳо ба ман маъқул шуд.”

Маҳкумшуда аз амали худ пушаймон шуда, аз додгоҳ содир намудани ҷазои сабуктарро талаб кардааст.

Dialog.tj