Дар Маркази ҷумҳуриявии илмии ҷарроҳии дилу рагҳо аввалин маротиба дар кишвар ба як бемор, ки бо аневризмаи қисми камонак ва шоҳраги поёнраванда ба ин муассиса муроҷиат намуд, стент-графт дар шоҳраги қафаси сина гузошта шуд.

Тавре ки маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар медиҳад, ба шаҳрванди 65-солаи Ҷумҳурии Узбекистон Мустафоқулов Илмомин дар рафти ҷарроҳӣ, ки бидуни беҳушкунӣ ва бе буриши бадани бемор ба тариқи сурох кардани раги хунгард аз пойи рост то мавзеи васеъшудаи шоҳраг анҷом ёфт, дар натиҷаи он дар ин мавзеъ стент-графт, яъне рагҳои хунгарди сунъӣ гузошта шуд, ки ин ҳолат қисмати васеъшудаи шоҳрагро пурра иваз намуд.

Гуфта мешавад, ки дар натиҷа, хун аз ҷои сиҳати шоҳраг ба раги сунъӣ гузашта, фишор дар дохили аневризма кам ва хавфи кафидани он аз байн рафт, ки ин ҳолат боис бар он мегардад, то бемор пурра шифо ёбад.

Иттилоъ дода мешавад, ки пас аз гузоштани стент-графт хатари кафидани аневризма пурра бартараф шуда, ин ҳолат имкон медиҳад, ки бемор ба ҳаёти муқаррарӣ баргардад.

Тибқи маълумоти табибони ин марказ, ҳоло дар минтақа чунин амалиёти ҷарроҳӣ ба ғайр аз Тоҷикистон танҳо дар Ҷумҳурии Қазоқистон гузаронида мешавад.

Dialog.TJ