Дар вилояти Хатлон маъракаи даъвати тирамоҳии ҷавонон ба сафи Қувваҳои Мусаллаҳи Ҷумҳурии Тоҷикистон оғоз шуда, дар рӯзи якум нақшаи даъват 76 фоиз иҷро шуд.

Тарве ки хадамоти матбуоти раиси вилояти Хатлон хабар медиҳад, шаҳру ноҳияҳои Бохтар, Вахш, Данғара, Норак, Дӯстӣ, Хуросон, Ховалинг ва Фархор нақшаи даъвати ҳарбиро дар рӯзи аввал 100% иҷро намуданд.

Иттилоъ дода мешавад, ки раиси вилояти Хатлон Давлаталӣ Саид зимни суханронӣ дар чорабинии тантанавии Рӯзи даъватшаванда ҷавонони ба хизмати ҳарбӣ сафарбаршударо ба муносибати оғози марҳилаи нави ҳаёташон табрик намуда, таъкид карданд, ки ҳифзи Ватан яке аз вазифаҳои муҳими шаҳрвандӣ мебошад.

“Хизмати ҳарбӣ барои ҷавон мактаби муҳими обутоби ҷисмонӣ ва маънавӣ буда, дар ташаккули интизом, масъулиятшиносӣ, ҷасорат ва садоқат ба давлату миллат нақши муҳим мегузорад”, - навиштааст манбаъ аз қавли раиси вилоят.

Дар ин росто, ба масъулони шаҳру ноҳияҳо, комиссариатҳои ҳарбӣ ва сохторҳои дахлдор супориш дода шуд, ки раванди даъвати тирамоҳиро дар доираи қонунгузорӣ, бо риояи шаффофият ва эҳтироми ҳуқуқу шаъну шарафи шаҳрвандон идома диҳанд.

Dialog.tj