Раиси вилояти Суғд Раҷаб Аҳмадзода зимни сафари корӣ ба шаҳри Панҷакент дар деҳаҳои Кулолӣ, Артуч ва Зари Ҳисор бо лоиҳаи сохтмони шабакаҳои оби нӯшокӣ ва полезӣ шинос шуд.

Тавре ки хадамоти матбуоти раиси вилояти Суғд иттилоъ медиҳад, лоиҳаҳо бо маблағгузории Мақомоти иҷроияи ҳокимияти давлатии шаҳри Панҷакент ва шарикони рушд амалӣ шуда истодаанд.

“Бо обёрии заминҳо боғҳои писта васеъ карда шуда, заминҳои азхудшуда барои кишти картошка истифода бурда хоҳад шуд”, - навиштааст манбаъ.

Иттилоъ дода мешавад, ки Раҷаб Аҳмадзода инчунин, бо тарзи истифодаи самараноки заминҳои кишоварзӣ ва кишти такрорӣ дар хоҷагии деҳқонии «Меҳнатобод»-и деҳаи Сӯфиён шинос шуд.

Гуфта мешавад, ки баъди ҷамъоварии ҳосили аввал кишоварзону деҳқонон ҳар қитъаи заминро самаранок истифода бурда, дар кишти такрорӣ сабзӣ, қаламфури булғорӣ ва дигар маҳсулоти кишоварзиро парвариш менамоянд.

Ба гуфтаи масъулину мутахассисони соҳа, аз кишти аввал 10-20 намуди маҳсулоти кишоварзӣ ҷамъоварӣ гардида, ба бозорҳои истеъмолии вилоят ва пойтахти мамлакат пешниҳод шудааст.

Dialog.tj