Пентагон иддао мекунад, ки ИМА ва шариконаш бо хуруҷи неруҳо ва таҷҳизоти эътилоф аз Пойгоҳи ҳавоии Эрбил, ба миссияи низомии худ дар Ироқ поён додаанд.

Шон Парнелл, сухангӯи Пентагон, дар як изҳорот иддао кард, ки Иёлоти Муттаҳида ва шариконаш дар эътилофи байналмилалӣ амалиёти “Азми қавӣ” алайҳи гурӯҳи террористии ДОИШ дар Ироқро расман ба анҷом расондаанд.

Пентагон, инчунин, иддао кард, ки неруҳо ва таҷҳизоти эътилофи таҳти раҳбарии ИМА дар доираи анҷоми ин миссияи 12-сола Пойгоҳи ҳавоии Эрбилро тарк кардаанд.

Бар асоси изҳороти Пентагон, неруҳои амниятии Ироқ, аз ҷумла Неруҳои пешмарга ва дигар сохторҳои амниятӣ дар минтақаи Курдистони Ироқ, аз ин ба баъд нақши асосиро дар таъмини амнияти кишвар бар уҳда хоҳанд дошт.

Дар идомаи ин изҳорот омадааст, ки Пентагон ҳамчунон ба шарикони ироқии худ омӯзишҳои ҳадафманд ва кумакҳои иттилоотӣ пешниҳод хоҳад кард.

Рӯзи гузашта Яҳё Расул, сухангӯи Вазорати дифои Ироқ, низ хабар дода буд, ки дигар ҳеч неруи эътилофи байналмилалии таҳти раҳбарии ИМА дар қаламрави Ироқ ҳузур надорад.

Бо ин ҳол, “Уолл стрит журнал” (The Wall Street Journal) субҳи имрӯз гузориш дод, ки бархе низомҳои дифоъи ҳавоӣ ва неруҳои дарёии ИМА ҳанӯз дар Ироқ боқӣ мондаанд.

Ҳамин тавр, дар ҳоле ки Пентагон аз анҷоми миссияи низомии эътилоф дар Ироқ хабар медиҳад, гузориши “The Wall Street Journal” аз боқӣ мондани бархе неруҳо ва таҷҳизоти низомии Амрико дар ин кишвар дарак медиҳад.

Dialog.tj