Александр Вучич, раиси ҷумҳури Сербистон, рӯзи якшанбе аз мақоми худ истеъфо дод ва ба давраи дуюм ва ниҳоии раёсати ҷумҳуриаш пеш аз анҷоми муҳлат хотима бахшид. Истеъфои ӯ роҳро барои баргузории интихоботи пеш аз муҳлати президентӣ боз мекунад.

Вучич дар Қасри президенти Сербия дар Белград ҳангоми суханронӣ ба тарафдоронаш гуфт, ки ин охирин шаби ӯ дар ин мақом аст. Ӯ ҳамчунин, изҳор дошт, ки ба хидматаш ба Сербистон ва корҳои анҷомдодааш ифтихор мекунад.

Истеъфои Вучич тақрибан ҳафт моҳ пеш аз анҷоми муҳлати президентии ӯ сурат гирифт. Қарори ӯ дар остонаи интихоботи пеш аз муҳлати парлумонии Сербия гирифта шудааст, ки қарор аст 25-уми октябр баргузор шавад.

Вучич баъди истеъфо метавонад ҳамчун номзади нахуствазир дар интихоботи парлумонӣ ширкат кунад. Ҳизби ӯ - Ҳизби Сербияи пешрафта (SNS) барои ин интихобот рӯйхати марбут ба Вучичро пешбарӣ кардааст. Дар сурати ташкили ҳукумати нав аз ҷониби ин ҷараён, Вучич метавонад ба мақоми нахуствазирӣ бирасад.

Бар асоси қонунҳои Сербистон, Ана Брнабич, раиси Маҷлиси миллии кишвар, пас аз истеъфои Вучич вазифаи иҷрокунандаи президенти Сербияро бар уҳда мегирад. Ин вазъ то интихоб шудани президенти нав идома хоҳад кард ва интихоботи президентӣ бояд дар муҳлати муайяншудаи конститутсионӣ баргузор шавад. 

Истеъфои Вучич дар шароите сурат мегирад, ки Сербистон тайи тақрибан ду соли охир шоҳиди эътирозҳои донишҷӯён ва мухолифони ҳукумат будааст. Ин эътирозҳо пас аз фурӯ рехтани сақфи истгоҳи роҳи оҳани шаҳри Нови-Сад дар моҳи ноябри соли 2024, ки бар асари он 16 нафар ҷон бохтанд, густариш ёфтанд. 

Вучич, ки аз соли 2017 президенти Сербия буд ва соли 2022 барои давраи дуюм интихоб шуд, тибқи конститутсияи ин кишвар ҳаққи ширкат дар интихоботи давраи сеюми президентиро надорад.

Dialog.tj