Кумитаи ҳолатҳои фақулода ва мудофиаи граждании назди Ҳукумати Ҷумҳурии Тоҷикистон хабар медиҳад, ки 10-уми август, соати 04:25 дар километри 39-уми шоҳроҳи Душанбе-Чаноқ, дар ҳудуди Ҷамоати деҳоти Варзоб-Қалъаи ноҳияи Варзоб автомашинаи сабукрави тамғаи «Донгфенг» ба дарёи Варзоб сарозер гардид.

Манбаъ навиштааст, ки дар дохили автомашина ронанда ва се мусофир қарор доштаанд. Тибқи маълумоти пешакӣ, ронанда ҳангоми ҳаракат аз сабаби хоболудӣ идораи воситаи нақлиётро аз даст додааст. Ронанда ва ду мусофир мустақилона беруншуданд, вале як мусофир Маҳмудова Гулсарахон Иброҳимовна, соли таваллудаш 1984 ба дарё ғарқшудааст.

Гуфта мешавад, ки наҷотдиҳандагон соати 07:06 ҷасади шаҳрвандро дар масофаи тақрибан 23 километр поёнтар аз маҳалли ҳодиса дар ҳудуди сарбанди Неругоҳи барқи обии Варзоб пайдо ва аз об берун оварданд.

Dialog.TJ